“Mi ta convenci cu ta e fe cu e pueblo tin ta loke ta yuda nos bay padilanti”
Diasabra ultimo na Misa Pro Catedral San Fransisco, a tuma luga e inauguracion di e Plaza San Juan Pablo II. Prome Minister Evelyn Wever-Croes tawata presente na e ceremonia bunita aki y a expresa cu ta un honor p’e pa ta presente y representa loke Gobierno por a duna como aporte pa e plaza wordo realisa. Apenas 2 siman pasa a tuma luga e desvelacion di e bunita busto di Papa Juan Pablo II cu a wordo traha pa nos artista local, señor Ciro Abath.
“Papa San Juan Pablo ta un inspiracion pa tur, tanto Catoliconan y no Catoliconan y ohala den e temporada dificil cu nos ta pasando aden, ainda saliendo di e pandemia, cu e inspiracion cu nos Papa, nos Santo San Juan Pablo, por inspira nos den e retonan cu tin nos dilanti”, Prome Minister a expresa.
Prome Minister a accentua cu Aruba tin un forsa inmenso, un resiliencia grandi. “E amor cu nos tin pa nos pais ta loke ta yudando nos. Pero si bo puntra ami, mi ta convenci, ta e fe cu pueblo tin ta loke ta yuda nos bay padilanti. Ohala cu e plaza aki cu ta carga su nomber, por inspira nos tur pa asina e fe por ta aun mas grandi, no solamente pa parokia di playa sino pa henter Aruba”.
Prome Minister a gradici pastoornan presente, especialmente pastor di Oranjestad pa su dedicacion, su pasion den tur e trabou cu ta wordo haci pa engrandece e parokia y e fe catolico.
“Dios bendiciona boso pa sigui cu e trabou bunita y importante cu bosonan ta haci. Nos mester realisa y mas ciudadano mester realisa cu realmente ta nos fe ta loke ta salba nos y nos fe ta locual lo yuda Aruba tambe pa bay padilanti”, tawata e palabranan cu Prome Minister Evelyn Wever-Croes a expresa na final di su discurso na e ocasion.
Prome Minister ta gradici DOW y tur esnan cu a haci esaki posibel despues di a ricibi e peticion pa nombra e plaza na nomber di Papa San Pablo pa e trabou diligente cu a wordo haci. “Mi ta hopi contento cu di parti di Gobeirno nos por a haci e aporte chikito aki”.
