E areanan cu a wordo cubri ta economia, salubridad y siguridad
Diahuebs 5 di augustus a sigui e ultimo reunionnan cu stakeholders pa e siman aki den cuadro cu formacion di Gabinete Wever-Croes II cu Partido MEP y Raiz riba e tema di economia, salubridad y siguridad. Dialuna e reunionnan lo sigui cu varios instituto den nos comunidad. Prome Minister Evelyn Wever-Croes a indica un biaha mas cu e reunionnan a bay bon y den bon ambiente.
E Asociacion di Bankeronan di Aruba a trece dilanti e retonan cu banconan ta enfrenta cu e reglanan di supervision cu nan tin cu hopi biaha nan mester haci investigacionnan mas profundo riba nan clientenan y nan lo desea di mira esaki agilisa. E reglanan di supervision na Aruba ta hopi estricto berdad y ta tarda hopi pa habri cuentanan na banco. Pero e nomber di Aruba ta hopi solido y positivo den e mundo bancario. Pero lo sinta cu esnan concerni pa purba agilisa esaki. A delibera tambe riba recuperacion economico di nos pais ya cu esaki lo saca nos for di problemanan financiero, lo crea cupo di empleo, lo bay percura pa nos hendenan no mester depende mas di FASE, loonsubsidie etc. Pa cu nos recuperacion tin hopi factor ta hunga un rol y un di nan ta e servicio cu banco ta duna. Nos lo sigui reuni den futuro ora cu e gobierno ta forma ya cu un di e prioridadnan ta pa nos tin un sistema bancario cu ta traha bon y lihe y cu ta solido y confiabel.
E di dos reunion tawata cu Stichting Verstandelijke Handicappen na Aruba cu ta e fundacion cu ta atende cu nos hendenan special. A papia di e subsidio cu a wordo corta aña pasa y esfuersonan cu Gobierno ta haciendo pa reestablece parti di e subsidionan, e retonan cu nan tin pa nan por brinda e cuido necesario. Despues di e reunion, sr. Reint Schutter a duna su declaracion na prensa.
Riba e tema di salubridad, a reuni tambe cu un organisacion di importadonan di remedi. Den cuadro di gastonan di salubridad kier purba yega na metodonan cu ta baha e gastonan di salubridad y di remedy y no e calidad di remedy. Si logra esaki, kizas lo por duna otro servicionan cu AZV no por duna aworakinan. Hopi ideanan a bin dilanti di con pa cambia e sistema pa haña remedi di calidad y na un prijs mas barata.
Stichting BOB ta encarga pa haci investigacion den nos comunidad riba e incidencia di cancer di pecho. E fundacion a trece dilanti nan retonan y nan a comenta cu nan kier amplia e investigacion na otro tipo di cancer tambe manera di tripa, matris, prostaat y di cuero. Mirando cu semper ta papia di gastonan di cuido, si por preveni e malesanan aki e lo ta un solucion pa tur hende. Despues di a reuni cu Formador, Sr Stefan Lucas a duna un declaracion na prensa.
CMMA, Coordinatie Mensen Handel Mensen Smokkelen a duna un splicacion di e tareanan cu nan tin. Nan a duna e indicacionnan caminda cu tin hende ta wordo treci di exterior, entre otro di Venezuela, kita nan documentonan, kita nan libertad, nan ta wordo paga un suma hopi abou y ta wordo exploita. Esaki ta abuso di hende y violacion di reglanan di Mensen Handel, Mensen Smokkel. Nan a comenta cu antes e enfasis tabata hopi riba hende muhe jong den e industria di sex pero awor e enfasis ta riba hende homber den e industria di construccion.
Nan a trece padilanti tur nan esfuersonan cu nan ta haciendo y nan campaña nacional pa asina tur hende por ta mas alerta kico ta Mensen Handel, Mensen Smokkel. Nan ta bay cuminsa cu proyectonan na scolnan pasobra nos ta kere cu ta hopi importante pa di chikito caba, muchanan of hobennan concoce e señalnan cu mester para keto na dje. Despues di e reunionan, Sra Jeanette Baars y Angela Persuad a duna informacion na prensa.
“Hopi punto a bin dilanti den e reunionnan di diahuebs. Varios di e puntonan aki ta wordo considera den e acuerdo di gobernacion y demas punto lo tene cuenta cu ne unabes tin un Minister encarga pa por bay mas extenso cu e diferente instancianan aki. Mi ta gradici tur cu a participa na e reunionnan y mi ta gradici prensa pa e tempo y dedicacion pa yuda informa nos comunidad cu e informacion cu e stakeholders ta comparti”, Prome Minister Evelyn Wever-Croes a duna di conoce.
