ORANJESTAD – Mundo henter ta mirando cu entusiasmo riba e weganan Paralimpico cu lo tuma luga dia 24 di augustus te cu dia 5 di september na Tokyo Japon. E weganan Paralimpico semper ta tuma luga despues di e weganan Olimpico. Nos atleta Elliott Loonstra ta e unico atleta di Aruba cu lo competi na e weganan Paralimpico na Tokyo. El a haya un invitacion bi-partite pa e deporte di Para-Taekwondo.

Elliott a nace sin un parti di su man drechi. Sinembargo esey nunca a stop e di caba su scol y logra su metanan den su bida. Elliott tin 3 aña ta train pa haci su soñonan di competi den e weganan Paralimpico na Tokyo un realidad. E ta cu hopi orguyo cu APC por ta parti di e proceso pa yuda Elliott logra su soño di ta un atleta Paralimpico. 

Na caminda pa e weganan Paralimpico, diaranson atardi, Prome Minister Evelyn Wever-Croes a entrega e bandera official di Aruba na Elliot Loonstra pa e por carga orguyosamente na Tokyo. 

“Den nomber di Gobierno di Aruba y pueblo di Aruba en general, mi ta desea Elliot tur clase di exito na e weganan Paralimpico na Tokyo. Nos ta orguyoso di bo y ta gradici bo pa ta nos representante na e weganan Paralimpico cargando nos bandera cu orguyo”, Prome Minister a expresa.

Prome Minister a gradici famia di Elliott y e ekipo cu ta su tras y Comite Paralimpico y Señora Nicole Hoevertzs pa e esfuerso cu nan ta haci pa sostene Elliott den su soño. Gradicimento tambe ta bay na señora Magali Maduro cu e bunita diseño di uniform cu nos atleta ta luci cu ne na Tokyo.

Na e ocacion tawata presente Parlamentario Hendrik Tevreden, Minister Xiomara Maduro y Minister Glenbert Croes.

LEAVE A REPLY

Please enter your comment!
Please enter your name here