Prome Minister Mike Eman a reuni cu e representantenan di De Hoge Dennen / Outrigger Impact na Laren, Hulanda. E encuentro tabata enfoca riba e posibilidadnan di cooperacion y financiamento internacional pa fortalece proteccion di naturalesa, conservacion di biodiversidad y transicion na un economia mas sostenibel na Aruba.
Segun Prome Minister Eman, De Hoge Dennen / Outrigger Impact ta un iniciativa relaciona cu un famia cu ta dedica parti di su capital na sosten di proyecto di sostenibilidad. E iniciativa ta explora modelo financiero cu por yuda proyecto di conservacion di naturalesa pa bira mas viabel y sostenibel riba termino largo.
Prome Minister a splica cu hopi biaha proyecto manera parke marino y area di conservacion ta enfrenta dificultad pa haya financiamento, precisamente pasobra nan meta principal no ta comercial. E tipo di cooperacion aki por crea oportunidad pa Aruba haya acceso na diferente fuente di financiamento internacional, incluyendo fondo Europeo.
Tres posibilidad di cooperacion pa Aruba
Durante e reunion, Prome Minister Eman y e representantenan di De Hoge Dennen / Outrigger Impact a identifica tres area cu por ofrece oportunidad pa futuro cooperacion. E prome area ta proteccion y maneho di parke marino y otro area natural. Aruba tin un organisacion manera Aruba Conservation Foundation, cu continuamente ta buscando manera pa amplia y fortalece nan trabou di conservacion. Acceso na financiamento adicional por yuda e organisacionnan aki realisa mas proyecto pa protehe naturalesa di Aruba.
E di dos area ta transicion di e empresanan na actividad cu tin menos impacto riba medio ambiente. Prome Minister a menciona e posibilidad di yuda empresa den sector turistico, incluyendo hotel y operador di watersport, pa inverti den vehiculo y ekipo mas sostenibel, incluyendo solucion electrico. Segun Eman, e tipo di inversion aki por haya sosten di fondo internacional.
E di tres area ta desaroyo di Aruba como un centro regional di conocemento. Prome Minister a destaca su vision pa fortalece presencia di instituto di investigacion, manera Wageningen, na Aruba. E obhetivo no ta solamente pa genera conocemento tocante sostenibilidad pa Aruba, sino tambe pa comparti e conocemento aki cu otro pais den region Caribe. Pa realisa e vision aki, acceso na financiamento internacional tambe lo ta importante.
Participacion di comunidad ta esencial pa proteccion di lama
Un otro tema importante cu Prome Minister Eman a destaca ta e necesidad di matene contact cu comunidad den e proceso di conservacion di naturalesa, particularmente den desaroyo y maneho di parke marino. Segun Eman, proteccion di naturalesa no por funciona adecuadamente si ta impone regla sin un dialogo previo cu e personanan cu ta uza e areanan concerni. Prome Minister a haci referencia na e experiencianan cu Parke Nacional Arikok, caminda durante hopi aña tabatin discusion tocante actividad cu por of no por tuma luga den e parke. Eman ta considera importante pa evita e mesun situacion den caso di e parke marino. Den e cuadro aki, lo tin sesion di dialogo cu piscado, operado di watersport y otro persona cu ta activo den lama di Aruba. E intencion ta pa identifica hunto e peliger cu ta un menasa pa bida marino y busca solucion cu ta permiti actividad economico continua, mientras cu ta mehora proteccion di ecosistema marino.
De Hoge Dennen ta mira oportunidad pa Aruba
Amarantha Ringeling, CFO y Head of Impact na De Hoge Dennen, a splica cu e reunion cu Prome Minister Eman tabata un combersacion pa explora tocante e retonan cu e islanan chikito ta enfrenta den transicion energetico y proteccion di oceano. Ringeling a indica cu nan a trata posibilidad di cooperacion entre sector publico y priva. El a confirma cu nan ta traha cu un administrador di fondo di inversion cu ta activo den Caribe y cu eventualmente por ta interesa den oportunidad na Aruba. Sinembargo, el a aclara cu e reunion tabata di caracter exploratorio y cu ainda no tin ningun decision concreto tocante inversion. Ringeling, cu ta un Arubiano profesional, a expresa su orguyo pa e iniciativanan cu Aruba ta desaroya den area di cambio di clima. Segun dje, Aruba ta sirbi como un ehempel den region Caribe pa su esfuersonan den e area aki.
Aruba ta sigui busca cooperacion internacional
E encuentro na Laren ta den liña cu Aruba su vision pa protehe su biodiversidad y desaroya un economia cu ta tene cuenta cu naturalesa. Entre e metanan nacional ta proteccion y maneho efectivo di 30 porciento di nos tera, costa y lama pa aña 2030, como tambe e programa di reforestacion y creacion di mas area berde.
Prome Minister Eman a califica e reunion como fructifero y a expresa su speransa cu e combersacionnan cu De Hoge Dennen / Outrigger Impact por continua, pa explora con e diferente posibilidad di cooperacion por contribui na e metanan di sostenibilidad di Aruba.
