“Mi ta kere den e grupo aki y den e preparacion cu nan tin pa nos hobennan”
ORANJESTAD – Diasabra anochi na Fort Zoutman, a tuma luga e celebracion di e di 20 aniversario di Parlamento Hubenil. Prome Minister Evelyn Wever-Croes tabata tin e honor di ta presente, na unda el a felicita y gradicinan pa cu e logro aki.
Prome Minister a indica di ta orguyoso di e trabou cu Parlamento Hubenil ta bin ta eherciendo pe ultimo añanan, na unda ta prepara nos hobennan di 12 pa 23 aña, no solamente pa nan por bira un Parlamentario of Minister, sino pa nan ta bon prepara y bon representa pa cualkier oportunidad laboral of personal den futuro. Mirando e trabou grandi cu Parlamento Hubenil a haci den e ultimo 20 añanan, y e interes di e hobennan pa cu cierto temanan manera medio ambiente, enseñansa y social, Prome Minister a bin cu e inciativa di invita Parlamento Hubenil pa bira un stakeholder hubenil oficial di
Gobierno. E iniciativa aki, ta duna e hobennan aki e oportunidad pa presenta nan puntonan dilanti na mesa di Gobierno, riba temanan cu nan ta sinti ta toca na nan. Mesun importancia cu Gobierno ta duna na e puntonan di stakeholdersnan manera ATIA, AHATA y Camara di Comercio, lo duna tambe na Parlamento Hubenil.
“E ta importante pa nos como gobernante scucha nan puntonan, mirando cu e trabou cu nos ta eherce awor, ta den preparacion pa nan tuma over den futuro. Mi ta kere den e grupo aki y den e preparacion cu nan tin pa nos hobennan. Mi ta felicita nan pa e bon trabou y desea nan hopi exito den future,” Prome Minister a expresa.
