Diadomingo atardi, Prome Minister Evelyn Wever-Croes a biaha pa New York pa atende cu e conferencia di “Commission on the Status of Women”.
Di tur parti di mundo lider di paisnan ta na New York pa atende e conferencia anual di Nacionnan Uni den cual ta trata e posicion di mucha muhe y hende muhe.
Prome Minister a atende e conferencia aki varios biaha caba, y como un minister president femenino, semper a duna un contribucion valioso. Alabes Prome Minister ta lidera e delegacion di Reino.
E conferencia e aña aki ta hopi particular, mirando cu ta 30 aña di Bejing Bejing Declaration and Platform for Action.
Durante di e conferencia di e Commission on the Status of Women, e enfoke principal lo ta pa evalua e implementacion di e Declaracion di Bejing. Lo enfoca riba e retonan cu ta stroba e implementacion pa por yega na trato y oportunidadnan igual pa mucha muhe y hende muhe y empoderamento di hende muhe.
Prome Minister a indica cu mirando cu e formacion di e gobierno nobo ta tumando hopi mas largo cu a premira, gobernacion mester continua.
“Mi compromiso ta cu pueblo di Aruba, y special mucha muhe y hende muhe, te na e ultimo dia di nos gobernacion” Prome Minister a indica.
