ORANJESTAD, Diabierna mainta, Prome Minister di Aruba señora Evelyn Wever-Croes y Minister di Salubridad señor Dangui Oduber a reuni cu Prome Minister di Corsou señor Gilmar Pisas y Vice Premier, Minister di Labor y Asuntonan Social di Corsou, señora Ruthmilda Larmonie.
Vice Premier di Corsou, señora Larmonie a duna un declaracion cortico na unda el a splica cu e motibo pa compaña Premier Gilmar Pisas den su bishita na Aruba ta pa e por cera conoci cu e gobernantenan di pais Aruba. Vice Premier Larmonie a expresa cu pe tawata un honor di por a combersa cu Prome Minister y Minister di Salubridad riba diferente tema di actualidad. Apart di e reunion aki, Vice Premier tambe tabata tin e oportunidad di tin un combersacion cu Minister di Labor señor Glenbert Croes pa por tin un idea di con e cartera aki ta ser maneha na Aruba.
Vice Premier Larmonie a duna di conoce cu e reunionnan tabata sumamente positivo y den bon esfera na unda a intercambia ideanan y a compromete pa sigui traha cu lasonan estrecho den bienestar di e paisnan den Reino.
Prome Minister di Aruba, señora Evelyn Wever-Croes ta gradici Premier di Corsou, señor Pisas y Vice Premier di Corsou, señora Larmonie pa nan bishita y pa e reunionnan cu a tuma luga. Aruba y Corsou ta uni den e retonan cu ambos pais ta pasando aden y hunto lo traha pa hiba e paisnan dilanti pa asina mira recuperacion di ambos pais.
