E prome periodo di aplicacion pa e Areglo di subsidio pa iniciativanan social pasado di sclavitud Transatlantico pa e parti Caribense di Reino nobo ta habri awe.
Fundacion- y organisacionnan, durante e prome periodo di aplicacion, por aplica pa un subsidio pa profesionalisa nan organisacion (categoria 1). Por haci esaki pa medio di
- un estudio, training of curso pa miembronan di directiva of colaboradonan di nan organisacion, y/of;
- Laga traha of mehora nan website pa asina amplia alcance di nan proyectonan.
E montante di e subsidio pa e prome periodo pa e parti Caribense di Reino ta un suma fiho di $10,000.
Disculpanan
E areglo di subsidio ta un di e accionnan relaciona cu e disculpanan pa e pasado di sclavitud Hulandes, cu minister-president a pidi riba 19 di december 2022. Pa e areglo di subsidio tin un presupuesto di mas di €29.3 miyon disponibel pa e parti Caribense di Reino.
En total tin 8 periodo di aplicacion pa cuater diferente subsidio, reparti riba tres aña, den cua organisacionnan por pidi subsidio pa proyectonan cu ta contribui na conscientisacion, reconocemento y conmemoracion y un miho comprension di e influencia di e pasado di sclavitud y su procesamento. Un siguiente periodo pa entrega peticion pa proyectonan entre $10.000 y $25.000 (categoria 2) ta habri riba 1 di december 2025, 09:00 or CET y ta cera riba 12 di januari 2026, 17:00 or CET.
Mas informacion
Pa e parti Caribense di Reino a traha un website special, Legacy to Future Funds. Aki riba tin informacion tocante e areglo di subsidio y un conexion cu e website di Uitvoering Van Beleid (UVB) di Ministerio di Asuntonan Social y Empleo cu ta ehecuta e areglo. Por entrega un peticion pa subsidio via e portal di subsidio di UVB. Informacion tocante e areglo y registracion riba e portal di aplicacion ta disponibel na Papiamentu, Papiamento, Ingles y Hulandes. Ademas por scoge pa e proceso di aplicacion, entre comunicacion na Hulandes of Ingles.
