Diabierna dia 10 di Juli, Aruba ta habri e porta aereo pa aeroliñanan Mericano bula bek pa Aruba treciendo turista. Den un investigacion haci pa SOLO DI PUEBLO, a bin sali na cla cu e prome avion for di Miami ya ta bendi pa 75% y lo trece abordo 110 persona, segun informacion di e propio compania ta mustra. American for di Miami lo ta bahando na Aruba diabierna dia 10 di Juli pa 2.10pm. American Airlines ta bendiendo ticket for di rond Merca pa Aruba, pero ta connect na Miami Airport.
Tin total di 5 vuelo di Merca confirma pa yega Diabierna cual lo sigui yega tur dia. Den total dia 10 di juli, Airport lo ta ricibiendo como 12 vuelo, sin conta vuelonan priva.
Sra. Tirsa La Sorte di AHATA a bisa ayera cu te ne momentonan aki, hotelnan na Aruba ta projecta un 9% di ocupacion pa luna di juli. Den un encuesta haci riba red social, hopi Mericano kier mira cu e aeroliñanan a cuminza bula bek, pa nan book nan ticket. Tin un demanda grandi pa vakantie den Caribe, principalmente door cu e cantidad di casonan ta tiki.
Por spera cu dentro di algun dia, e aeroliñanan por anuncia cu nan ta agrega mas vuelo pa Aruba.
