Recien Hues di Corte di Husticia a dicta sentencia den un caso tres candidato pa bira notario a cuminsa contra e decision di Gobierno pa nombra un otro persona.
SOLO DI PUEBLO por a compronde cu Hues a rechaza e protesta di Hillegonda Rodriguez-Taekema di oficina di Notario Taekema, Cyrielle de Nobrega Arends y Julisa Dabian contra e decision di minister di Husticia y Asuntonan Social di e Gobierno anterior cu a nombra Carine Rafine como notario.
Ta asina cu riba 28 Maart 2025, e Gobierno anterior a nombra Carine Rafine como Notario entrante 1 Mei 2025.
E decision di Gobierno a haci cu Rodriquez-Taekema, Nobrega Arends y Dabian a cuminsa un caso di protesta contra e decision aki. Ta asina cu Notario Taekema ta bayendo cu pensioen y mester un Notario pa tuma su funcion. Candidatonan di su oficina a aplica.
Tratamento di e caso aki a tuma lugar luna pasa 23 y 29 April 2025.
Hues den su evaluacion den e sentencia ta contradeci ponencianan di parti di Gobierno y Rafine cu ta riba aprobacion di Hof e nombramento di Rafine a tuma lugar. Hues a mustra cu tin un procedura cu mester sigui caminda miembronan di Corte Superior (Hof) tin cu laga e candidatonan pasa un examen y tambe tin otro procedura cu mester sigui pero no ta asina cu Hof ta duna un recomendacion na Gobierno pa cu e nombramento di Notario.
Hues a mustra cu Hof a propone e tres candidato cu a cuminsa e caso di protesta. Pero ta asina cu e Gobierno a propone Rafine y Hof ta haya cu e ta capacita pa haci e trabao.
Hues su conclusion ta cu e ta rechaza e protesta di e tres candidatonan.
