Como reaccion riba e articulo reciente di 24 Ora cu a acusa ex-Minister di Deporte Endy Croes di supuesto “manipulacion” den e proyecto di Aruba Sport Unie (ASU), SOLO DI PUEBLO ta presenta e otro banda di medaya.
E proyecto di Centro Deportivo Betico Croes (CDBC) tabata un iniciativa legitimo pa mehora facilidadnan deportivo na Santa Cruz, y e proceso di asignacion di subsidio a sigui e protocolonan existente.
E Proyecto Tabata Transparente y Pa Beneficio di Comunidad
E proyecto di CD. Betico Croes tabata enfoca riba entre otro construccion di un cancha di atletismo y un mini tereno di futbol pa muchanan y hobennan y scolnan di Santa Cruz cual su ubicacion ta tras di e Centro Deportivo.
E intencion tabata cla: duna e comunidad acceso na facilidadnan deportivo di calidad. E hecho cu e materialnan a ser cumpra na China no ta nada sospechoso! Esaki ta un practica comun pa logra mihor prijs y calidad pa proyecto di gobierno. China ta un suplidor di varios material deportivo.
E “Bestedingsovereenkomst” Tabata Ilegal
Ta corecto cu un acuerdo di besteding a ser firma dia 16 di september 2024, pero esaki no ta prueba di corupcion. E acuerdo aki tabata un instrumento pa asegura cu e placa di subsidio ser usa correctamente pa e proyecto. E hecho cu pago a cuminsa dos dia despues no ta un “red flag”—esaki ta normal den proyecto cu tin lunas den preparacion y cu ta pa beneficio di e comunidad.
E Aumento di Subsidio Tabata Hustifica
E aumento di 739.500 florin no tabata un acto arbitrario. E proyecto original a expande pa inclui mas facilidadnan deportivo debi na peticion di e comunidad y necesidad di mas espacio pa entrenamento. CAD mes ta admiti cu e placa tabata begroot y no a sali di nada.
Ex-Minister Endy Croes No Tabata su so Den Decisionnan
Tur decision riba e proyecto a ser tuma den consulta cu multiple departamentonan, incluyendo Directie Financien, huristanan, conseheronan y expertonan. E idea cu Endy Croes por a haci tur cos su so ta totmente falso. E tabata parti di un equipo di trabao cu a opera den marco di ley.
DWJZ su conclucion ta reforsa e legalidad di e proceso
E carta di Directie Wetgeving y Juridische Zaken (DWJZ) a confirma cu e bestedingsovereenkomst ta valido y legal y cu e fondo tabata asigna conforme e reglamentonan. Nan a señala cu maske por tin otro forma, e no tabata violacion di ley ni mal uso di fondonan publico.
Conclucion: No Ta Corupcion, Sino Trabao pa Comunidad
Prome cu bay na conclusionnan di corupcion, nos mester analisa e contexto completo. E proyecto di ASU tabata un esfuerzo legitimo pa mehora deporte na Aruba, y e procesonan financiero no ta mustra señal di malversacion. Ningun parti den rapport di CAD ni DJWAZ a bisa algo di corupcion/ malversacion/ manipulacion. Alcontrario, a bisa pa “paga ASU” loke falta.
Keda pendiente pa mas analisis di e caso.
