E proyecto di revitalisacion di Bernardstraat na San Nicolas ta sigui avansa cu apoyo di boluntarionan y habitantenan di e bario. Durante e ultimo actividad, dos cas mas a ricibi un verf nobo: e cas na Bernardstraat #220, unda Juldeh Bah ta biba, y tambe e cas na Bernardstraat #171, di Damaris Garcia Hernandez. E iniciativa ta forma parti di e esfuerso pa duna un caya importante di San Nicolas un aspecto mas bunita, colorido y yen di bida.
Juldeh Bah a expresa su alegria cu e resultado. “Mi ta hopi contento cu con tur cos a resulta. Desde cu mi a mira nan cuminsa e trabou, mi a haya e resultado hopi bunita. E caya ta bira mas limpi y mas bunita. Mi kier a gradici e empresa, e boluntarionan y Prome Minister Mike Eman pa tur esfuerso cu nan ta haci pa mehora e bario.”
Prome Minister Mike Eman a indica cu, despues di e gran exito di Dia pa Cuida Aruba, caminda mas cu 400 persona a participa haciendo diferente luga di Aruba limpi, e atencion awor ta concentra atrobe riba e proyecto di Bernardstraat. “E meta ta pa prome cu fin di aña nos por celebra Pasco cu un caya di San Nicolas completamente renoba. Nos kier cu tur e casnan cu a pone nan mes disponibel pa participa den e programa di Bernardstraat por ricibi un verf nobo y cu, cu apoyo di comunidad, nos por sigui traha hunto na mantencion di e area.”
Segun e Prome Minister, e iniciativa no por logra sin e dedicacion di e boluntarionan, cu siman tras siman ta entrega nan tempo pa yuda cambia e bario. Mike Eman a destaca tambe e papel importante Fundacion Revitalization Bernhardstraat cu a wordo lanta especificamente pa lidera e proyecto di revitalisacion. ” Fundacion Revitalization Bernhardstraat a wordo crea pa revitalisa e entrada di San Nicolas, dun’e mas color, un identidad Caribe y un ambiente cu ta inspira orguyo den comunidad. Nos ta hopi contento di mira cada biaha mas boluntario uni na e iniciativa.”
E Prome Minister a expresa su sincero agradecimento na tur boluntario, sponsor y e colaboradornan cu ta sostene Fundashon Bernardstraat. “Hunto nos ta sigui traha pa un San Nicolas mas bunito y un Aruba cu nos tur por sinti orguyo di dje.”
