Den medio di comunicacion ta tuma nota cu e proyecto di mantencion di e caminda den Santa Cruz cu ta forma parti di e caminda principal Kibaima – Tanki Flip ta hayando hopi critica riba nivel politico. Pa medio di esaki DOW lo kier clarifica esaki.
DOW a traha den 2018 un masterplan pa mantencion di nos camindanan principal na Aruba pa asina nos por garantiza cu e red di caretera ta den bon condicion pa seguridad di nos trafico y sostene nos economia.
A base di e analysis di e condicion di caminda ta establece e prioridad y fondo nan poni disponibel ta haci e planning pa e trabao.
Na aña 2018-2019 DOW a haci e prome parti esta, recap e caminda entre rotonde di Santa Cruz pa e crusada banda di Ex Wema (Santa Cruz 80).
Na 2022 DOW recap un otro pida caminda di Kibaima – Tanki Flip entre Rooi Bosal #10-A pa Rooi Bosal 16.
Den e begroting 2023, DOW a presupuesta e siguiente pida caminda entre e crusada di Ex Wema (Santa Cruz 80) te na e crusada di 88 Food Mart (Santa Cruz 72) pa haci e trabao.
Aki ta unda cu DOW a haci mencion di cede di MEP como punto di referencia. Esaki a wordo uza solamente como un punto di referencia y pa nos usuarionan por compronde na un manera simpel di cua caminda nos ta referiendo na dje enbez di bay busca adres.
Pa un caminda bin na remarce/ prioridad pa haya mantencion of wordo asfalta, DOW ta evalua e caminda abase di e siguiente criterianan:
- Funcion di e caminda;
- Estado di e caminda;
- Frequencia di mantencion;
- Con “bieu” di caminda y
- Cuanto automobilistanan ta haci uzo di e caminda.
Aki ta unda e caminda cu ta score mas halto ta haya prioridad y ta wordo poni riba e lista pa asfalta. E plan ta pa asfalta e caminda principal di Kibaima – Tanki Flip completo den fases.
