E plan di restauracion di barionan, parti di vision mas amplio pa revitalisa comunidad residencial, ta sigui demostra resultado concreto, y Mabon ta bibo ehempel. E proyecto di rehabilitacion di e flatnan ta actualmente den su fase final, cu entrega previsto dentro di dos siman.
Robert Correa (ALBO), contratista responsable pa ehecucion di e trabounan, a splica cu e proyecto a representa un reto considerable, mirando cu habitantenan a sigui biba den nan apartamento durante tur e proceso di renobacion.
“Renobacion den un edificio habita semper ta un reto,” Correa a expresa. “Tin hopi movecion, hopi buya, pero nos a traha cu respet pa cada persona su cas y nos a percura mantene bon comunicacion cu cada habitante.”
E trabounan a inclui:
- Cambio di bentana y porta
- Restauracion completo di fachada
- Pintura exterior cu un color nobo y mas moderno
- Reenforsa murayanan pa mas privacidad
- Mehoracion di parking, cada apartamento cu su espacio propio
- Instalacion di hekwerk y portanan pa mas siguridad
- Restauracion di trapi y structuranan di beton
Segun Correa, un di e retonan di mas grandi tabata reemplasa parti di e structura di beton y trapinan, pero e ekipo a logra completa esaki exitosamente.
“Nos ta contento cu e resultado final. E color nobo a duna e edificio un aspecto moderno, y lo principal ta cu e habitantenan ta satisfecho,” el a indica.
E coordinacion cu comunidad, describi como positivo. A pesar di algun inconveniente temporal, e ambiente general a keda di colaboracion y comprension.
Cu e proyecto casi completo, Mabon ta presenta un imagen renoba, simbolo di e esfuerso continuo pa mehora infrastructura residencial y fortifica orguyo di e bario.
