Un psychiater di Hulanda ta na Aruba pa evalua dos sospechoso di asesinato cu arma di candela.
SOLO DI PUEBLO por a compronde cu e psychiater di Hulanda a bin Aruba special pasobra tin keho di dos Hues di Corte di Husticia riba psychiater di Aruba.
DOS HUES NO CONTENTO CU RAPORT DI PSYCHIATER
Den un periodo di 1 siman, dos Hues a expresa nan disgusto riba e raport di psychiater. Un di e Huesnan ta haya cu e raport no ta duna suficiente informacion di e sospechoso, pa asina Hues por tuma un decision corecto. E otro Hues a cuestiona e hecho cu ainda no tin un psychiater disponible pa evalua e sospechoso.
E promer keho tabata 8 Juli 2022 caminda Hues a tuma un decision mas tempran den e lamentable caso di tira mata e dama Shayuri (19) riba 4 Juni 2021, caminda e sospechoso principal ta Izak Principaal.
Hues a mustra cu evaluando e caso, el a constata cu e raport di psycologo ta mustra cu Izak no ta responsabel pa su actonan. Hues ta haya bon motiva di psycologo cu mester aplica ley di adulto y pone Izak na disposicion di Gobierno (TBS).
Sinembargo, Hues ta mustra cu psychiater su evaluacion ta laga na desea. Psychiater ta haya Izak culpable pasobra ta e mes a bay haci’e. Hues no ta haya esaki suficiente splica. Tampoco Hues ta haya suficiente splica e conclusion di psychiater.
E di dos keho tabata 14 Juli 2022, den e lamentable caso caminda Jason Mathilda a tira su tata E.Mathilda mata riba 13 December 2021. E caso aki a wordo posponi un biaha caba, pasobra no tabatin un raport di psychiater. Hues 14 Juli 2022 a bisa cu ainda no tin un psychiater.
PSYCHIATER DI HULANDA NA ARUBA
Hues a bisa cu e por a compronde cu e siman aki, lo bin un psychiater di Hulanda cu lo bay evalua e casonan. E tin hopi experencia riba e tereno aki. E psychiater sa viaha mas biaha pa Antiyas Hulandes y Aruba.
