Den un carta habri anonimo dirigi na Minister Rene “Baba” Herde y na henter e pueblo di Aruba, un ciudadano sumamente preocupa a cuestiona fuertemente e decision di Gobierno pa extende vigencia di e Plan di Ordenansa Teritorial cu Calificasion di Valides (ROPV 2021) te cu 17 di juli 2029, un medida cu ta drenta na vigor oficialmente entrante 1 di september 2026. E carta ta lansa un serie di pregunta skerpi y directo tocante e futuro di vivienda riba nos isla y ta adverti cu, si no bin claridad inmediato, desaroyo residencial pa famianan local lo keda practicamente gevries pa tres aña mas.
Aunke e autor ta reconoce cu Aruba tin mester di ordenacion teritorial estricto, proteccion di naturalesa y reglanan cla pa frena construccion iresponsabel, e ta enfatisa cu no por ignora e crisis di vivienda cu e propio pueblo ta pasando aden. Costonan di material, man di obra, tereno y financiamento bancario ta sigui subi drasticamente. Ora cu e reglanan di ROPV bin limita severamente denso, haltura, parcelacion y posibilidadnan pa construi riba terenonan apto, e consecuencia directo ta cu e prijs final di cas ta bira completamente inaccesibel pa e ciudadano comun.
E preocupacion aki ta bira mas urgente mirando cu den Ministeriele Beschikking nr. 9199/25 di 27 di februari 2026, Gobierno mes a señala cu lo uza e instrumentonan legal di “wijziging” (cambio) y “vrijstelling” (exencion) pa responde na desaroyonan teritorial urgente, y a hasta encarga asistencia pa prepara e plannan di cambio aki. Pa e motibo ey, e carta ta exigi pa Minister Herde y Departamento di Infrastructura y Planificacion (DIP) publica e maneho y criterianan cla cu lo uza entre 2026 y 2029.
Entre e nuebe preguntanan publico dirigi na e mandatario, e ciudadano ta exigi sa:
- Cua ta e “wijzigingsplannen”, zonanan y reglanan specifico cu Gobierno ta preparando pa cambia?
- Ki dia y pa medio di cua procedura transparente e sector priva y publico por pidi exencion pa proyectonan residencial urgente?
- Kico Gobierno lo haci pa evita cu proyectonan cu ya ta den preparacion of den tramite di permiso keda para of sufri retraso pa varios aña mas?
- Si Minister Herde ta dispuesto pa sinta na mesa cu arkitectonan, contratistanan, desaroyadornan, planificadornan y doñonan di tereno pa compronde e retonan practico di e sector.
E carta ta subraya cu e yamada aki no ta pa kita regla ni pa destrui naturalesa, sino pa logra un berdadero balance y transparencia. Tres aña ta hopi tempo pa un famia warda riba un dak, pa inversionnan keda den incertidumbre y pa e sector di construccion keda sin rumbo cla. P’esey, e peticion final na Gobierno ta pa presenta un calendario y criterio transparente cu ta permiti desaroyo sostenibel, garantisando cu famianan Arubiano no keda exclui di por haya un cas pagabel riba nan propio pais.
