Eman & Gelrien: Un duo cu ta mata tur nan promesa y duna tur trabao na “friends & family”, sin solicitatie
Oranjestad— Gobierno di Aruba a anuncia cu nan a nombra un “Diplomatico Cultural” na Hulanda, un puesto aparentemente pa promove cultura Arubiano den exterior. Pero loke ta un bon iniciativa, a bira un chiste di mal gusto ora cu e puesto a wordo duna na un afiliado politico di AVP, sin cu ningun hende den comunidad Arubiano na Hulanda ni a haya oportunidad pa aplica.
Sin Publicacion, Sin opensolicitatie:
Tin cientos di Arubiano califica na Hulanda, artistanan, educadornan, lider di comunidad, carnavalistanan y nigun anuncio a sali pa e funccion aki. E nombramento a bay den secreto. E trabao a bay direct na un persona conecta cu Partido AVP, ex politico, mustrando cu nunca tabata nan intencion pa busca e mihor candidato, pero cu unicamente ta un funccion pa fix “friends & family”.
Promesa di Transparencia a Cay na na awa:
E mesun Eman i Gerlien cu a grita cu nan tabata cla cu “no mas faboritismo”, awor ta haci exactamente e contrario. Gerlien Croes a critica e sorto di practicanan aki como “politica tradicional” y cu su gobierno lo no permiti e practica aki, pero lo garantisa “open solicitatie”. Kico a pasa cu e promesa? Gerlien a mata su promesa, ‘morto morto’. E no por pretende di no sa, pasobra tur e cosnan aki ta pasa den Conseho di Minister unda e tambe ta aproba.
Un cant’i man den cara di comunidad Arubiano na Hulanda:
Na Hulanda tin cientos di Arubiano cu ta contribui na cultura i sociedad Arubiano tur dia. Nan tabatin derecho pa solicita pa e puesto, pero nan ni a haya e chens. Gobierno a prefera pa crea y duna e puesto na un yiu di partido. No unicamente e persona lo gosa di un salario barbaro den miles di florin, pero ta dune derecho tambe pa biaha riba’bao den KLM pa Aruba, 25 x pa aña, pe por haci su trabao, projecto, estudio, preparacion, pe por representa Aruba. Sin conta cu e por viaha rond Europa pa intercambio cultural. Si esaki no ta ‘biba lekker’, ta kico e ta anto?
E Pregunta cu nace ta: Esaki ta Trabao of Premio?
Si e gobierno tabata serio, nan lo: A publica e vacatura na manera transparente. A busca e persona mas califica, no e mas conecta. A involucra e comunidad Arubiano na Hulanda den e proceso. Nos ta haci e pregunta na Gerlien y Eman: Esaki ta realmente un trabao of un premio?
Pero nan mentiranan ta sigui cu e mesun practica di semper: duna puesto na “friends & family”. Eman i Gerlien, Pueblo ta wak boso! E pueblo Arubiano no ta stupid. Promesa di transparencia ta bira chiste, i awor tur hende ta mira cu e gobierno ta duna puesto na nan compinchinan.
Esaki no ta diplomacia, esaki ta corrupcion disfrasa.
