Quota Club of Aruba a realisa un actividad special na Cas Amada na San Nicolas como parti di Quota’s Care Month, cu ta tuma luga anualmente durante luna di maart. E luna aki ta dedica na conscientisacion y servicio pa promove cuido, empatia y apoyo na nos comunidad.
Durante e bishita, Quota Club of Aruba a entrega varios articulonan esencial pa contribui na bienestar di e residentenan. Entre e donacionnan tabata tin laken, serbete, tayo, bekers, productonan di higiena personal, weganan, kleurboek di mandala, regalonan pa Pasco Grandi, y aparatonan practico manera toaster y sandwich makers pa uzo diario.
E programa tabata inclui un bunita presentacion musical door di sra. Maybelline Arends Croes, kende a interpreta canticanan Arubiano y a toca guitara, creando un ambiente agradabel y participativo. E actividad a finalisa cu un almuerzo pa tur e residentenan.
Quota Club of Aruba ta un organisacion di servicio dedica na yuda y sostene esnan den comunidad, cu enfoke particular riba hende muhernan, muchanan y personanan cu problema di oido. E club ta promove solidaridad, amistad y normanan etico halto den sociedad. Pa medio di iniciativanan manera e actividad na Cas Amada, Quota Club of Aruba ta sigui cumpli cu su mision di sirbi y fortifica nos comunidad.
E club ta gradici tur su miembronan boluntario cu a participa y a contribui na realisacion di e actividad aki.
