Minister Rocco Tjon a informa diasabra merdia riba un boto cu a wordo intercepta, cu tabata biniendo Aruba. Esaki a sosode via signal di radar cu a activa Kustwacht.
Feliz weekend Aruba,
Ayera, den oranan di marduga, e radarnan a capta algun movecion sospechoso den nos awanan. Esaki a causa cu Kustwacht a activa mesora, caminda a logra detecta un boto rumbo pa Aruba.
Danki na e strategisch grensoverleg cu tin entre diferente departamento hudicial pa cu siguridad na nos frontera, a haya cooperacion di “Maritime Operations Center” kende a dirigi e Metal Shark di Aruba pa investiga e boto aki mesora. Despues di un persecucion extenso, a logra detene e boto aki cu cinco persona abordo y alrededor di 400 kilo di droga. Awor e investigacion ta sigui y ta den man di Cuerpo Policial su unidad di crimen organiza
Di parti di Ministerio di Husticia y Asuntonan Social, nos ta reconoce y aplaudi e cooperacion estrecho cu a tuma luga entre e diferente departamentonan hudicial, cu a logra captura e boto aki den un tempo record. Esaki tambe ta muestra di e importancia di e radarnan, cual dentro di poco, Aruba lo ta hayando su di tres sigui pa su di cuater radar, asina mehorando e siguridad na nos frontera.
Un pabien na personal di Kustwacht cu a eherce un tremendo trabou.
