Plataforma Raiz ta sumamente orguyoso di a presenta e candidatonan cu lo sigui cosecha e futuro di nos pais. Den un evento inspirador na Mangashina, Lider di Raiz, Ursell Arends, a duna un bon bini caluroso na esnan cu a uni nan mes na nos Plataforma pa sigui trece cambio di berdad pa Aruba.
Den su discurso, Arends a reflexiona riba e caminda cu Raiz a tuma for di comienso. Desde 2017, Plataforma Raiz a traha pa compronde con e aparato publico di nos pais ta traha y a profesionalisa su lidernan pa sirbi e pueblo di Aruba mihor.
Den un presentacion cu ta destaca compromiso, profesionalismo, y dedicacion, Raiz a introduci e candidatonan cu ta alinea na RAIZ su balornan. Cada un, experto den su area di conocemento y capacidad amplio pa ehecuta RAIZ su vision pa logra un cambio fundamental pa Aruba.
“Nos a atrae personanan cu vision, cu pasion, y cu gana di traha pa un miho Aruba. Raiz ta un plataforma cu ta forma lidernan den comunidad y awe nochi nos tin honor di por a lansa campaña di eleccion hunto cu nos candidatonan y cu nos sostenedornan cu a uni na nos proposito,” Arends a añadi durante su presentacion.
Cu e lansamento di su candidatonan, Raiz ta cla pa sigui lidera un platafprma di cambio pa e bienestar di nos pais y su pueblo. E plataforma cu a bin ta planta e simia di politica nobo cu awe nos por mira tuma rais den comunidad. Un anhelo profundo pa poltica di contenido y respet mutuo.
RAIZ ta cla pa cosecha e fruta di e siminana planta pa nos hendenan tambe por cosecha e fruto di nan labor.
