Registracion ta habri awor pa e seminario cu Red Arubiano di Prensa Profesional ta organizando den cuadro di Dia di Prensa cu ta ser celebra dia 1 di september. E evento anual aki ta combina un seminario cu un anochi cu tres orador y dos workshop practico pa periodista cu kier compronde miho con nan por aplica inteligencia artificial den nan trabou.
Seminario 25 september
E seminario lo tuma lugar riba diabierna 25 di september di 6:30–8:30 PM na Impact Hub Aruba. Oradornan invita durante e seminario aki ta Noel Algarín-Martínez, editor na Centro de Periodismo Investigativo de Puerto Rico (CPI), cu e presentacion riba etica y AI: Human Judgment Is Not Optional. Tambe lo tey orador Vincent Smit, hefe di redaccion na 1Almere na Hulanda cu e presentacion riba ‘Vibe Coding in the Newsroom’. Ademas lo tin un orador local Rodolfo Rodriguez kende ta un Digital Strategist & Developer cu lo presenta e topico ‘Claude for Journalists’. Entrada ta gratis pa periodista, pero registracion ta obligatorio.
Workshop 26 & 27 september
Riba diasabra y diadomingo e seminario lo continua na unda lo tin den oranan di mainta un workshop cu lo tuma lugar na ATIA Aruba. Diasabra esaki lo ta cu Laurens Ras, Chief Automation Officer cu lo duna un workshop ‘AI Essentials for Journalists’ na unda lo siña con por configura ChatGPT basa riba bo propio trabou y estilo di skirbi, pa e resultado zona manera bo y no manera tur otro chatbot. Diadomingo e workshop ta continua cu Vincent Smit kende lo duna e workshop ‘Vibe Coding in Practice’ den cual bo por descubri con por usa inteligencia artificial pa transforma un idea periodistico den un prototipo cu ta funciona, hasta si bo no tin experiencia cu coding.
E workshopnan ta gratis pa miembronan di RAPP. Pa no-miembro, e prijs ta Afl. 75 pa cada workshop. Lunch ta inclui. Participantenan mester trece nan propio laptop.
Lugarnan pa e wrokshop ta limita, pues registra na tempo. Pa mas informacion por tuma contacto cu RAPP via rapp.aruba@gmail.com
Di e forma aki Red Arubiano di Prensa Profesional kier crea espacio pa periodistanan por topa otro, inspira y sostene otro, y sigui desaroya y profesionalisa nan mes, pa nan por eherce nan trabou mihor y contribui na un periodismo mas fuerte na Aruba. E seminario aki ta posibel danki na e sosten di nos patrocinadonan: Aruba Tourism Authority, WEB Aruba, Hyatt Place Aruba Airport, Ministerie van Binenlandse Zaken en Koninrijksrelaties, SETAR y Aruba Airport Authority.
FIN
Nota pa redaccion: pa mas informacion por tuma contacto via rapp.aruba@gamil.com
