Director di Monumentenbureau Raul Gei, na e ceremonia di seyo monumental a indica cu e decision pa restaura y proteha e edificio na Bernhardstraat 203 ta basa riba su balor historico significativo pa San Nicolas. El a indica cu e Misa ta un di e edificionan religioso mas antiguo den e area, loke a contribui na e decision pa duna prioridad na su conservacion.
Gei a splica cu Monumentenbureau, den cooperacion cu Prome Minister Mike Eman y otro partnernan, ta traha activamente pa identifica, evalua y proteha edificionan cu tin balor monumental. El a reconoce cu e proseso di otorgacion di status di monumento ta uno cu ta rekeri tempo y analisis cuidadoso, pero cu ta esencial pa garantisa proteccion a largo plaso.
Segun Gei, actualmente tin varios edificio na Aruba cu ya a haya e status di monumento, mientras cu otronan ta den proceso di evaluacion. Gei a enfatisa cu e meta ta pa sigui amplia e proteccion di patrimonio, specialmente na San Nicolas, unda tin un concentracion importante di edificio historico.
Ademas, el a destaca e importancia di cooperacion cu propietario di casnan y comunidad, indicando cu concientisacion riba balor di patrimonio ta un paso clave pa logra preservacion duradero.
