Den prensa a sali un comunicado di APFA, den cual nan ta elogia desicion di Juez pa gerencia di APFA no cay bao e ordenansa Nacional pa regla entradanan di ehecutivonan den sector publico. Berdad e veredicto di corte di Prome Instancia a cay na fabor di e gerencia di APFA pa loke ta cierto practica huridico, manera e terminologia independiente di sector publico. Pa nan “the sky is the limit” ora ta trata nan salarionan.
E Juez por tin rason den su argumento. Pa mi persona, hopi miembronan y pensioenadonan, kendenan ta doño di e 30% y di e 70%, nos tin otro opinion cu locual Gerencia ta trece.
Como miembro di APFA, ami y aserca hopi participante y pensioenadonan ta di opinion cu mester regla e salarionan extra halto, unda “the sky is the limit” den Gerencia di APFA.
E hunta di comisariado di APFA ta consisti di dos representante di Gobierno, dos di sindicatonan y un persona laga nos yame neutral. Wel Gobierno, tambe den Parlamento, tanto esnan cu ta apoya gobierno y sigur e partido di oposicion mas grandi ta di mesun opinion cu mester aplica e LNT. Mi ta bisa esaki di e partido di oposicion, pasobra e tremendo discusion aki a cuminsa na Hulanda cu e partido CDA, E Balkenende-norm, aliado di e partido di oposicion.
Na mi humilde opinion, sindicatonan ta di mesun opinion. Esaki ta un posicion di sindicalismo na nivel mundo. Pues na Aruba, mundo politico y mundo sindical ta di mesun opinion. Gobierno no mester a bay Juez, nan ta yama e sindicatonan pa reunion, discuti e topico aki y despues Gobierno hunto cu sindicalismo ta duna mandato na e representantenan di Gobierno y di Sindicalismo, total 4, den Hunta di Comisariado di APFA. Ta nan ta dicidi ariba e salarionan di gerencia di APFA.
Esnan cu mi a combersa ariba e topico aki ta di mesun opinion cu no por permiti salarionan demasiado halto y cu mester pone un plafond na salarionan den nos APFA di acuerdo cu LNT. Mi ta convenci cu 95%, por ta mas, di tur miembro y pensioenado di APFA ta na fabor pa uza e reglanan di LNT den APFA. Pues pone un reunion pa Gobierno y sindicatonan discuti e topico aki y trece reglanan pa nan representantenan den Hunta di Comisariado.
E reparticion 30% ta sali for di Prima y 70% ta sali for di e inversionnan cu gerencia a haci .
Un otro topico cu a sali for di e comunicado di Gerencia di APFA ta, pakico Gerencia ta haci e reparticion aki, cual ta crea hopi confusion. No ta bay pa e cifranan 30% y 70%, pero e reparticion eytras. Kico ta e nificacion o mihor bisa e intencion of mal-intencion eytras.
E comunicado ta bisa cu e fondo di APFA ta consisti di dos componente, uno ta 30% di e primanan cu e participantenan ta paga y 70% cual ta drenta for di e inversionnan haci dor di Gerencia. Un divicion mahos y cual por crea multiple splicacionnan peligroso.
Si e ta un simpel splicacion di unda e fananciamento ta bini no tin problema, pero e pregunta ta pakico ta haci e distincion entre e 30% y e 70%.
Na varios pais na Latino-America, den e era di Plan Condor y politica masal di privatisacion, a privatisa fondonan di Pensioen, tambe a crea un sorto di reparticionnan unda e miembronan por a ricibi nan percentahe y esnan cu a inverti e resto di e finansas. Maske tabata uza otro percentahenan, mas halto pa e grupo bao 30%. E privatisacion di fondonan di pensioen a crea un grupo nobo di inversionistanan y AYO Fondo di Pensioen.
Pa mi persona y sigur pa tur miembro cu ta pagando y tur pensioenado, e prima cu Gerencia di APFA ta yama e 30%, cual ta bini di e primanan y e 70% cu ta drenta for di inversionnan cu gerencia ta administra, tur ta pertenece na miembronan y pensioenadonan.
