Minister Geoffrey Wever:
Reaccion riba introduccion DucaPro
Mirando cu siman cu a pasa tabata tin hopi comunicacion y informacionnan mixto riba rednan social over di e fundacion DucaPro cu a anuncia cu entrante prome di januari 2024 lo mester cuminsa paga pa uzo di musica licensia, como Minister encarga cu tanto Bureau Intellectuele Eigendom, como comunicacion, mi kier a duna un prome reacion.
Ta asina cu musiconan por registra nan canticanan y asina nan canticanan no por wordo uza sin permiso of sin compensacion. E derecho aki na Aruba ta basa entre otro riba articulo 39 di Statuut y e Auteursverordening.
Musiconan usualmente ta asocia nan mes na diferente organisacionnan rond di mundo cu ta representa nan y cu ta salvaguardia nan creencia y ta percura pa nan wordo paga ora cualkier organisacion uza nan derecho intelectual, manera un cantica. Tur e organisacionnan aki rond di mundo ta cera acuerdonan bilateral cu otro a base di cual nan ta cobra y distribui e compensacion pa uso di musica den un pais na e artista. DucaPro ta un organisacion asina na Aruba cu lo bai cobra pa e uzo di derecho di autor, basicamente den nomber di e artista y percura pa reparti e entradanan na e artista concerni, pues esaki por bira un entrada importante pa e musiconan local, pero na mes momento lo forma un peso financiero adicional pa e radio emisoranan.
Mester remarca cu e relacion ta un relacion entre e artista cu ta miembro di un organisacion cu ta representa e artista, e organisacion y tur otro organisacion similar rond di mundo. Esaki no ta un iniciativa di gobierno, ni tampoco ta algo cu Gobierno di Aruba por stop of mitiga, eta un relacion completamente priva (privaatrechtelijk) y usual rond di mundo.
Apesar di esaki, mi ta spera si cu DucaPro drenta den dialogo cu tur radio emisora pa splica detayadamente con nan lo opera pa asina e introduccion por bai na un forma structura y cu menos impacto negativo pa e radio emisoranan. Ami di mi banda tambe lo bai drenta den dialogo cu tanto DucaPro como e radio emisoranan. Mi a puntra tambe conseho riba e tema aki mirando cu ta algo nobo pa Aruba cu lo tin su impacto. Nos mester cuminsa awo cu bon informacion y dialogo y sigur wak con por mitiga cualkier impacto negativo – Minister Geoffrey Wever.
