DEPORTE | INTERNATIONAL – Weganan di La Liga Santander a continua den fin di siman unda cu ultimo wega di diadomingo tabata entre Real Madrid y Celta Vigo.

Real Madrid a mira accion atrobe den Santiago Bernabeu despues cu e tabata cera pa renovacion y awor a keda cla pa wega di futbol. Celta Vigo no a inicia e campeonato akin a e mihor manera ya cu tin acumula solamente 1 punto y ta na di 18 lugar riba tabla di posicion mientras cu Real Madrid tabata tin 7 punto na comienzo di campeonato.

Celta Vigo den e wega aki a subi cu hopi animo y na di cuater minuut di wega ta bay ariba cu score di 1-0 despues di fayo den defensa di Real Madrid, gol a wordo anota pa Santi Mina cu asistencia di Iago Aspas.

Despues di e gol aki Real Madrid a pone presion di biaha pa busca manera di empata e wega y tabata na di 24 minuut, Karim Benzema ta empata e wega 1-1 cu asistencia di Federico Valverde. Real Madrid a sigui pone presion, pero na di 31 minuut tabata Franco Cervi ta duna Celta Vigo ventaha un biaha mas den e wega aki haciendo e wega 2-1.

Asina tambe prome mitar a bay den descanso cu score di 2-1 na fabor di Celta Vigo. Den di dos mitar, apenas 1 minuut di wega, Real Madrid ta empata e wega aki un biaha mas cu un tremendo gol di cabez di parti Karim Benzema.

E gol aki a cay manera baño di awa friew pa esnan di Celta Vigo y Real Madrid a tuma rienda di e wega, na di 58 minuut, Vinicious Jr. ta haya un tremendo pase for di Karim Benzema cu ta usa su velocidad pa laga defensa y deposita e bala den net pa haci e wega 3-2.

Na di 72 minuut, Eduardo Camavinga kende a debuta cu Real Madrid ta logra un debud di soño ora cu e ta anota di 4 gol pa asina practicamente sentencia e wega cu score di 4-2. Na di 87 minuut, Real Madrid ta haya un tiro penal na su fabor y aki Karim Benzema ta logra anota su di tres gol di e wega pa asina haci e wega 5-2 na fabor di Real Madrid. Asina tambe e wega a termina cu score di 5-2 na fabor di Real Madrid cu ta yega 10 punto, mientras cu Celta Vigo ta keda na di 18 lugar cu solamente 1 punto.

Resultado di otro wega tabata entre Espanyol y campeonnan di aña pasa Atletico Madrid y aki Atletico Madrid ta gana cu score di 2-1, Valencia ta gana Osasuna 4-1 y Real Sociedad ta gana Cadiz cu score di 2-0.

LEAVE A REPLY

Please enter your comment!
Please enter your name here