DEPORTE – Diadomingo weganan di futbol di La Liga Santander di Spaña a continua unda cu ultimo wega di diadomingo tabata entre Valencia y Real Madrid.
Ambos ekipo a yega na e wega aki cu 10 punto y tabata comparti e prome lugar pa algun siman.
Den prome minuutnan di wega Valencia a haci hopi atake y tabata hunga rapido riba tereno, pero Real Madrid a sa di defende bon y tabata bay riba contra atake.
Prome mitar a bay den descanso cu score empata 0-0.
Den di dos mitar, Valencia a pone mas preshon cu den prome mitar y tabata na di 66 minuut ta bay ariba cu score di 1-0 cu gol anota pa Hugo Duro.
Valencia sinembargo a haci hopi desgaste fisico y poco poco a nota cu e cansancio tabata hopi mas cu di Real Madrid y aki unda Real Madrid a probecha di velocidad di Vinicious Jr caminda cu Karim Benzema ta dune un bon asistencia pa asina Vinicious Jr empata e wega 1-1 na di 86 minuut.
Na di 88 minuut Real Madrid ta bay ariba cu score di 2-1 e biaha aki tabata Vinicious Jr ta cruza e bala pa Karim Benzema anota e di dos gol pa Real Madrid.
Asina tambe e wega a termina cu score di 2-1 na fabor di Real Madrid caminda cu e victoria aki ta bira lider solido di campeonato di La Liga Santander cu 13 punto.
Resultadonan di otro weganan di diadomingo ta lo siguiente, Mallorca y Villareal ta empata 0-0, Real Sociedad y Sevilla tambe ta empata 0-0, Real Betis y Espanyol ta empata 2-2, golnan di Real Betis a wordo anota pa Adria Pedrosa cu ta un auto gol y Nabil Fekir, golnan di Espanyol a wordo anota pa Aleix Vida y Leandro Cabrera.
