Realign Coaching Consultancy & Services conhunto cu ta lansa e programa “Ban pa Bay 2025” pa tur studiante cu a haci peticion pa un Arubalening

Directie Onderwijs Aruba en colaboracion cu Realign Coaching Consultancy & Services, cu sosten di Stimuleringsfonds y SEA (Strategic Educational Alliance – Nederlandse Samenwerkende Hogescholen) ta presenta orguyosamente e programa unico: “Ban pa Bay 2025”.

E programa aki ta consistí di 6 tayer unico, specificamente diseña pa yuda tur studiante cu a haci peticion pa un Arubalening y cu ta bai cuminsa cu un studio superior, sin importa si nan ta bai studia na Aruba, Curaçao, Hulanda, Merca, Canada of cualkier otro pais den exterior.

🎓 Kico ta “Ban pa Bay 2025”?

Un serie di 6 sesion interactivo, practico, educativo y motivacional, entre nan:

• 2 tayer online (un ya a tuma luga riba 16 april)
• 3 tayer fisico ku guia practico 
• 1 tayer cu studiante hunto cu nan mayornan 

E tayernan ta cubri topiconan manera:

– Con pa studia den educacion superior, prepara bo portfolio y planificacion

– Assertividad, imagen propio y liderazgo

– Transicion pa bida universitaria na Aruba y tambe den exterior

– Maneho di emocion, independencia 

– Traha e presupuesto cu ta fit abo!

– Preparashon mental y cultural pa un miho integracion

👨‍👩‍👧‍👦 Pa ken e programa ta?

– Studiante cu a aplica pa un Arubalening y cu ta bai cuminsa un estudio superior na Aruba of den exterior

📅 Fechanan Importante:

E tayernan lo tuma lugar entre april y juni 2025.
Studiantenan cu a aplica pa un Arubalening a ricibi e link di registracion den nan email. Den e formulario nan por indicá e fecha y ora di preferencia.
📅 Fecha pa registracion ta te dia 22 di april 2025.

Cada grupo lo tin un maximo di 25 participante, pa garantisa calidad y atencion personalisa. Esaki ta un oportunidad unico pa ta bon prepara y di e forma aki optimalisa bo exito for di comienso di bo studio!

“Ban pa Bay” ta un oportunidad unico pa yuda nos studiantenan prepara pa un futuro yena di reto, autonomia y exito! 

Bo futuro ta cuminsa awe. Ban pa bay!