E proposito di Dios den nos bida , ta pa nos glorifica Dios cu nos bida.
Ora rebeldia y inmoralidad presenta nos tin cu compronde cu e forma di bida ey no ta boluntad di Dios , tampoco e ta agrada Dios.
Pa nos haña a e proposito di Dios pa nos bida, nos tin cu busca Dios den nos oracion, y Dios lo revela Su mes na nos su perfecto boluntad pa nos.
Ta pesey ta para scirbi den Romanos 12:2 : Y no sea conforme e mundo aki, ma sea transforma pa medio di e renobamento di boso mente, pa boso por comproba kico ta e bon y agradabel y perfecto boluntad di Dios.
Palabra di Dios ta bisa nos den Salmo 37:4: Deleita bo mes den Señor y e lo duna bo e deseonan di bo curason. Ora nos ta kier deleita nos mes den Señor ningun clase di rebeldia, arogancia y orguyo por ta presente den nos bida.
Proverbionan 17:11 Ta para scirbi: Un hende rebelde ta busca solamente maldad, pesey un mensahero cruel lo wordo manda contra dje.
Isaias 1:19-20 ta para scirbi: Si boso ta dispuesto y ta obedece ,boso lo come e mihor di e tera.Ma si boso nenga y rebeldia, spada lo debora boso. Di berdad e boca di Señor a papia.
Salmo 68:6 ta para scirbi: Dios ta provee un cas pa e solitario. E ta saca e presonan y guianan na prosperidad, ma e rebeldenan ta hiba na un tera seco-seco.
Ay di e yuinan rebelde Señor ta declara,kendenan ta ehecuta un plan cu no ta di Mi, y cu ta sera aliansa cu no ta di Mi Spirito, pa montona pica riba pica.( Isaias 30;1).
Den e sombra y scuridad di mundo no tin refugio pa e yuinan di Dios, pesey nos no por kere den promesa di hende, pero nos mester kere den e palabra di Dios cu ta eterno, pasobra eyden tin bida, tanto awor como bida eterna.
Maske cuanto cos mundo por ofrece, nos salbacion y nos integridad ta bini na prome lugar.
Ta dificil pa un creyente por haci manera Esau , kende a bende su primogenitura pa un plato di cuminda, y despues ni cu lagrima no por a hanje bek.
Ta dificil pa hende cu ta creyente rechasa Dios door di comete adulterio y cay den perversidad profundo.
E prioridad di Dios den nos bida ta nifica tur cos pa nos bida y no ta cos di gamble cune, pasobra sin nos sa e enemigo ta pone nos den enemistad cu Dios,
Samson a haci wega cu pica, y ora e tabata kier a lanta pensando cu e Spirito di Dios tabata cune, a resulta cu e Spirito di Dios a bandone.
Rebeldia, mentira y inmoralidad ta pone cu e Spirito Santo di Dios, ta aleha for di nos, paso e Spirito Santo di Dios no ta obra den rebeldia.
Ta tempo pa hende para un rato keto, y rasona kico ta mas importante pa nos bida, salbacion, integridad, respet, moral y etica of inmoralidad y perversidad ?
Pasobra rebeldia ta manera e pica di bruheria, y capricho ta manera inikidad y idolatria. Pasobra bo a rechasa e palabra di Señor E tambe a rechasa bo como rey .( 1 Samuel 15:23).
Romanonan 2:5 ta bisa lo siguiente: Ma pa motibo di bo capricho y bo curason cu no ta repenti, bo ta montona furia pa bo mes, den e dia di furia y revelacion di e huicio husto di Dios.
Dios tene Misericordia y Compasion.
Sinceramente, Pastor Marcel Balootje.
