Rebeldia ta ora un persona, ta scohe pa boluntariamente bay contra ley y Dios Su autoridad y instruccion.
Den 2 Timoteo 3:1-5 Pablo ta papia di tempo trabahoso, con hende su karakter lo cambia, y tur esey ta rebeldia contra Dios.
Rebeldia ta hiba hende na perdida, pasobra ningun hende cu lanta contra Dios y su principionan a gana e bataya, pasobra Dios ta Todopoderoso.
Awendia nos ta mira hende ta haci hopi, cos di rebeldia, cu aprobacion di leynan terenal, pero nada di esey no ta pone cu nan por surpasa boluntad y principio di Dios.
Si un mucha ta rebelde contra su mayornan, y tin otro famia, of bisinja, of amigonan ta apoye den su maldad, nan ta complice pa su destruccion segun Efesionan 6:1-4.
Si un homber/muher ta comete adulterio y su amistadnan ta apoye, nan ta forma parti di su destruccion, pasobra nan no stime, nan no kier mire bon. ( 1 Corintionan 6:12-20).
Tur esnan cu ta cana y biba den obranan di carni segun Galationan 5:19-21 ta cana den rebeldia, pesey e palabra di Dios ta bisa cu nan lo no hereda e reino di Dios.
Tur esnan cu ta cana den inhusticia segun 1 Corintionan 6:9 ta cana den rebeldia contra Dios y lo no hereda e reino di Dios.
Aki no tin cuenta di husgamento, ta asunto di bisa un hende e berdad, y e berdad lo hacie liber.
Palabra di Dios ta bisa; No ganja boso mes, Dios no ta laga haci bofon di dj’E, pasobra loke un hende sembra, esaki tambe e lo cosecha.( Galationan 6:7).
Hopi biaha hobennan ta den rebeldia, di droga, alcohol, trip riba caya tur dia, no ta honra nan mayor, no kier sinja na scol, no kier haci nada den cas, y ta pensa cu e cos ta duel nan mayor, y nan ta lubida cu ta den rebeldia contra Dios nan ta, y ora cos ta bay malo cu nan , nan kier rabia tambe.
Un homber cu tin trabao, cu tin placa, y no ta cria su yiunan ta den rebeldia, e ta pio cu un pagano, pasobra e ta ninga di cumpli cu su deber dilanti di Dios y hende.
Un persona cu no kier pordona su prohimo, ta den rebeldia, pasobra palabra di Dios ta bisa, cu si nos no pordona nos prohimo, Dios tampoco ta pordona nos, y falta di pordon por hiba hasta na perdida di nos libertad of mas doloroso ainda por causa bida di hende.
Ta tempo pa hende para keto un rato y pensa te na unda nan kier yega cu nan rebeldia ( 1 Samuel 15:23) pasobra rebeldia contra Dios ta amistad cu diabel, ta porta habri pa malicia y scuridad.
Ora un hende ta crece spiritualmente , e ta pasa den un proceso di crecemento, pasobra ta Dios purbando su curason pa e ta fiel den cosnan di Dios.
Hasta ora hende kier logra un puesto na su trabao, e ta pasa den un proceso, den cual e tin di sinja su trabao bon, pa e ta capacita.
Pero ora un hende mes ta hinca su curpa den problema, y ta rebeldia contra palabra, principio, y mandamento di Dios, e persona ey ta rebelde pasobra boluntariamente e a scohe pa haci esey.
Mayornan cu ta rebelde, ta contamina cas cu rebeldia, y despues kier tira e falta riba e yiunan, pero si un mayor no ta biba di acuerdo cu e palabra di Dios e mes ta sembra rebeldia den cas.
Den rebeldia no tin ningun beneficio.
Sinceramente , Pastor Marcel Balootje.
