Causa di adiccion hopi biaha ta profundo, y hopi biaha e ta doloroso, no ta facil pa trata cune.
No ta tur hende por trata cu perdida di un ser keri.
No ta tur hende por trata cu perdida di matrimonio y famia.
No ta tur hende por trata cu kiebro di un relacion cu un persona cu nan ta stima.
No ta tur hende por trata cu perdida di un bon trabao.
No ta tur hende por trata cu accidente caminda cu nan a causa morto.
No ta tur hende por trata cu pa motibo di nan buracheria otro a keda gravemente perhudica.
No ta tur hoben por trata cu rechaso di nan mayornan.
No ta tur hoben por trata cu un divorcio den cual nan ta wordo prohibi di ta hunto cu tata of mama.
No ta tur hende por trata cu un accidente den cual nan ta keda invalido.
No ta tur hende por trata cu abuso sexual, den cual nan a keda traumatisa.
Dios den su inmenso misericordia sa di esey , pesey Hesus a bisa den Mateo 11:28 : Bin serca Mi tur cu ta cansa u carga y lo mi duna boso sosiego.
E palabra aki ta nifica cu si bo confia den Hesus y tene pasenshi ( Salmo 40) e lo kita e carga cu bo tin y duna bo bida nobo.
E mundo ta birando scur, hooopi scur, hende a bira sin respet, ta haci locual cu nan kier, y tin hasta ta bisa cu nan ta sirbi Dios manera nan kier, y hasta tin ta cana rond y bisa cada ken tin nan Dios, pero ningun di e bagamunderia nan ey no ta para scirbi den Bijbel.
Bijbel ta bisa nos cu ta un Dios so tin , sea bo ta den su boluntad of bo ta for di su boluntad, serca Dios no tin bida neutral, pasobra segun bo biba asina bo ta caba, sea bo ta bay cielo pasobra bo a kere den Cristo Hesus y a ricibi bida eterna, of bo a rechasa Cristo y a bay pa morto eterno den fierno.
Pa motibo di duele , rabia y rechaso, hopi ta scohe e caminda di droga of alcohol, nan no kier deal cu ningun situacion, pesey nan ta pone nan mes den adiccion, pa asina nan no ta responsabel pa nada.
Hopi biaha hende ta perde speransa den asuntonan di bida cu nan ta pensa cu solamente ora nan ta droga of burachi nan ta bon. Y esey nos tur sa cu ta enganjo di diabel.
E asunto aki ta mas serio cu hende ta kere pasobra e enemigo por domina locual nan ta yama bo willpower, y ta solamente Cristo Hesus por lanta bo bek, pasobra no lubida cu esun cu ta controla bo mente ta controla bo bida.
Mateo 11:28 tin un nificacion hopi profundo pa nos bida, pasobra no solamente esnan cu ta adicto na droga y alcohol ta carga, pero tur hende cu ta biba den scuridad y for di boluntad di Dios ta carga.
Pesey Hesus a bisa bin serca mi tur cu ta cansa y carga, cu rabia, cu duele, cu rechasa, cu inmoralidad, cu dolor, cu corupcion, cu enganjo, cu abuso, tur locual por cansa bo mente y afecta bo salud mental, cu por hiba bo na uso di droga of bo ta cuminsa kere cu mester di mas muher, of mas homber den bo matrimonio y asina lo bo ta feliz.
Laga seriedad goberna nos bida, Cristo Hesus ta e solucion. Sinceramente, Pastor Marcel Balootje
