Nos Dios ta un Dios di reconciliacion , esey nos tur sa, no ta boluntad di Dios, pa Famia ta kibra, dividi, separa, pasobra Dios ta un Dios di union, pasobra caminda tin union tin bendicion.

Dios tabata den Cristo no mirando e mundo su picanan e a duna na nos e ministerio di reconciliacion, pesey ta nos deber di bisa tur hende pa nan reconcilia cu Dios.( 2 Corintionan 5;19).

Caminda tin desunion,e educacion di yuinan no ta alcansa e meta cu Dios ta bisa nos den su palabra, y nos tur ta mira cu desunion ta e base pa tur tipo di malicia haña reis.

Ora tin desunion entre mayornan, no tin e coordinacion necesario pa lanta e muchanan den amor di Dios, pasobra e enemigo, ta busca tur manera pa venena e mente di hubentud. Nos ta biba den tempo trabahoso, caminda hobennan facilmente por cay den inmoralidad y crimen, si nan no haña e guia necesario di nan mayornan.

Tin hopi distraicion y mentira ta bay rond cu nos tin di evita di tur forma posibel, pa hobennan no cay aden y asina nan perde nan integridad y nan hubentud.

Ta masha importante ora un hoben por controla su vocabulario, pasobra den esey e hoben ta demostra si e a haña educacion na cas, si e hoben ta papia hopi palabra sushi, ta demostra cu sea na cas e a siña, of na cas no tin coreccion.

Den reconcilicion cu Dios nos ta cuminsa haci lo siguiente:

Pesey considera e miembronan di boso curpa terenal como morto pa inmoralidad,impuresa, pasion, deseo malo,golosidad,cu ta idolatria.

Pasobra pa e motibo ey e furia di Dios ta bini riba yuinan di desobedencia.( Colosensenan 3:5+6).

Ma awor boso tambe mester pone tur esakinan un banda: rabia, furia, malicia, calumnia,palabra sushi for di boso boca. No gaña otro , como cu boso a pone un banda e hende bieuw cu su practicanan malbado.

Y bisti di e hende nobo cu ta wordo renoba den un conocemento berdadero,segun e imagen di Esun cu a cree.

Y boso soporta otro y pordona otro, si un di boso tin un keho contra otro,mescos cu Señor a pordona boso, asina boso tambe mester haci.( Colosensenan 3:8-10).

Reconciliacion ta trece bendicion den famia, y esey ta demostra un presencia di Dios den e cas, pasobra caminda Dios su Palabra ta eynan Su presencia ta. 

Ora no tin presencia di Dios den un cas, e sombra di scuridad ta presenta, y asina manifesta cu orguyo, rabia , odio y falta di pordon.

Scuridad ta presenta pa motibo di falta di luz, pero mesora cu e palabra di Dios presenta den e cas, e scuridad mester bay.

Reconciliacion ta necesario, pa bon comunicacion, bon relacion tanto cu Dios como cu hende.

Den esaki nos mester reconoce e balor di Cristo Hesus den nos bida , pasobra sin Cristo reconciliacion no ta posibel, Cristo Hesus ta e unico mediador entre Dios y hende.

No ta existi un cas cu no tin mester di e presencia di Dios.

Hende mester stop di rechasa, pasobra pa motibo di rechaso di Dios, hopi lo no alcansa bida eterna, pasobra Dios a duna su Yiu unigenito pa ken cu kere den dj’E no bay perdi ma haña bida eterna. Esun cu no ta kere den e Yiu, den un palabra bisa a rechasa e Yiu, lo ta condena, pasobra e a prefera scuridad en bes di lus.

Awor mas cu nunca laga nos busca reconciliacion den tur famia, pa asina ricibi bendicion di Dios.

Sinceramente,

Pastor Marcel Balootje.

LEAVE A REPLY

Please enter your comment!
Please enter your name here