Diabierna, orguyosamente ta anuncia cu Aruba a ricibi su reconocemento como un UNESCO Biosphere Reserve. E reconocemento aki ta alinea cu e vision describi den Aruba Conservation Foundation (ACF) su Multi Annual Corporate Strategy 2023-2032, cu ta guia e transformacion di e organisacion independentie for di un organisacion di maneho di parke pa un organisacion di maneho di conservacion.
Bou e pilar strategico “Leadership in Nature Conservation”, ACF a identifica e logro di un UNESCO Man & Biosphere (MAB) como un accion strategico pa yuda mehora Aruba su posicion den conservacion, colaboracion entre naturalesa y comunidad, y promove desaroyo sostenibel na un nivel nacional. E logro aki ta alinea cu ACF su vision di maneha naturalesa den su totalidad y no solamente areanan protegi.
Natasha Silva, Chief Conservation Officer, ACF ta comenta cu e logro aki ta uno cu nos mester ta hopi orguyoso di dje, especialmente awe riba Dia Mundial di Medio Ambiente y dialuna awo cu globalmente ta celebra Dia Mundial di Ocean.
Segun Silva, e reconocemento internacional ta confirma cu naturalesa di Aruba ta forma un di e tesoronan mas valioso di nos isla. “Nos naturalesa ta forma parti di nos identidad, ta sostene nos bienestar y ta profundamente conecta cu e futuro di Aruba,” asina el a expresa.Sin embargo, Silva a enfatisa cu Aruba tambe ta enfrenta diferente reto ambiental, incluyendo perdida di habitat natural, presion riba recursonan natural limita y e impacto creciente di cambio climatico. Segun Silva, e reconocemento di UNESCO no ta un solucion inmediato pa tur reto, pero si ta brinda un direccion cla y un marco structural pa Aruba sigui traha riba conservacion y sostenibilidad.
Un aspecto importante di e reconocemento, segun ACF, ta cu Aruba awo ta mira como un sistema conecta den su totalidad, incluyendo areanan terestre, costero y marino. “Naturalesa no ta conoce frontera,” Silva a splica. “E decisionnan cu nos ta tuma pa Aruba completo ta afecta directamente e salud di nos medio ambiente.”
E concepto di Biosphere Reserve ta invita Aruba pa mira mas leu cu solamente area protehi y pa integra consideracionnan ambiental, social y economico den un mesun conversacion nacional. Segun Silva, e siguiente paso importante lo ta e desaroyo di un plan di maneho cu lo guia e proceso aki den colaboracion cu diferente stakeholder y comunidad.
Aruba Conservation Foundation a indica cu e reconocemento tambe ta crea oportunidadnan nobo pa investigacion cientifico, partnership internacional, acceso na fondo y intercambio di conocemento. Esey ta conecta directamente cu diferente iniciativa cu Gobierno di Aruba y partnernan local ya a inicia den añanan reciente, incluyendo proyecto di herbebossing y restauracion natural na Aruba y e establecimento di Aruba Marine Park.
Silva a conclui enfatisando cu e oportunidadnan cu UNESCO Biosphere Reserve ta brinda tambe ta trece responsabilidad. “Aruba mester sigui mustra compromiso cu sostenibilidad door di accion, monitoreo, cuido y maneho responsable riba termino largo,” el a expresa.
Segun ACF, e reconocemento internacional aki ta un recordatorio cu proteccion di Aruba su herencia natural ta un responsabilidad comparti pa gobierno, organisacionnan y comunidad hunto.
