Desde dialuna 1 di November 2021 Departamento di Labor y Investigacion (DAO), Oficina Central di Estadistica (CBS) y Centrale Bank di Aruba (CBA) a cuminsa cu e di diesun (11) Encuesta di Forsa Laboral (EFL 2021). Pa e EFL 2021 a escohe un muestra di adresnan reparti riba henter Aruba cu a participa na Censo 2020 y cu a indica cu nan lo kier sigui traha hunto cu CBS pa futuro investigacionnan. Te cu diaranson 10 di november 2021, un total di 829 hogar a yena e cuestionario. Esaki ta encera cu 1.533 persona di 15 aña of mas a yena e cuestionario caba.
Esnan cu ainda no a completa e cuestionario online via di e link cu a wordo manda via e-mail dialuna 1 di november, lo ricibi un recordatorio entrante 12 di november 2021 via Whatsapp. E number di cual lo ricibi un Whatsapp ta 5651545. Pa esaki CBS lo usa e number di telefon cu hogarnan mes a yena den e cuestionario di Censo 2020. E mensahe cu lo wordo manda via Whatsapp lo contene un link pa yena e cuestionario di EFL 2021.
A scohe pa manda un recordatorio via Whatsapp, pa motibo cu un parti di esnan cu a ricibi e e-mail di CBS dialuna 1 di november kizas no a haya chens di yena e cuestionario ainda ya cu e e-mail aki posiblemente a bay den nan junk of spam box.
Por scohe pa yena e cuestionario via e link cu a wordo manda via e-mail of e link cu lo wordo manda via Whatsapp. Si ta prefera pa yena e cuestionario via e link cu a wordo manda via e-mail, nos ta pidi encarecidamente pa controla e e-mail box y tambe e junk of spam box pa verifica si a ricibi un e-mail di CBS. E e-mail a wordo manda for di LFS2021@cbs.aw.
E cuestionario ta facil pa yena. Simplemente click riba e link inclui den e e-mail of den e mensaje manda via Whatsapp y e cuestionario ta habri pa por cuminsa contesta e preguntanan. No lubida na final pa click riba e sign di FINISH pa asina e formulario wordo entrega digital.
Esnan cu tin pregunta, of tin duda den kico pa contesta na algun pregunta, of esnan cu ta desea di haña un yudansa pa yena e cuestionario, por yama e Helpdesk di EFL 2021 na: 524 7400 (bo persona lo wordo yama bek!) of por manda un e-mail na: LFS2021@cbs.aw.
Personanan cu durante di Censo 2020 a indica cu nan kier coopera cu investigacionnan cu CBS, pero no tabata tin un e-mail, lo wordo yama pa yena e encuesta via telefon.
E encuesta mester wordo yena pa tur persona den e hogar. Esnan di 15 aña bay ariba lo haya preguntanan relata na educacion, labor y entrada segun principionan di e Organisacion Internacional di Labor (ILO) ya cu nan ta wordo considera como parti di e forsa laboral di un pais.
E team di EFL2021 ta telefonicamente disponibel pa contesta cualkier pregunta cu tin, y tambe nan por asisti den e yenamento di e cuestionario. Nan lo ta disponibel di dialuna pa diabierna for di 8:00am –
12:00pm y di 2:00pm pa 8:00pm, den weekend for di 12:00pm pa 06:00pm na number di telefon: 524 7400 (puntra pa e team di EFL 2021). Si yama y e liña ta ocupa, sigui haci intento pa haya un persona na liña. Tambe por manda un e-mail na: LFS2021@cbs.aw cu bo preguntanan, of pa solicita pa un cita pa yena e cuestionario via telefon.
E EFL 2021 tin como meta pa forma un imagen actual y completo di e mercado laboral di Aruba. Pa medio di e informacion compila tambe lo determina otro caracteristicanan y indicadornan importante di e mercado laboral cu ta necesario pa un analisis mas profundo di e mercado laboral, manera e.o. e grado di participacion y e nivel di educacion di esnan emplea, esnan no emplea y esnan cu no ta activo riba e mercado laboral.
Privacidad
Tur informacion lo wordo procesa anonimo y lo ser publica solamente den forma agrega. E privacidad di cada persona y hogar ta wordo garantisa pa DAO, CBS y CBA. Nos ta gradici bo persona di antemano pa bo participacion na e EFL 2021. Pa mas informacion riba e EFL 2021, bo por tuma contacto cu nos libremente na number di telefon 524 7400.
