Dia 30 di mei 2025, RED Democrático ta celebra su 22 aña di existencia. E partido ta mira patras riba dos década di compromiso político y lucha pa crea un sociedad mas justo, inclusivo y sostenibel pa tur ciudadano Arubano.
Directiva di RED Democrático ta enfatizá e papel constante cu e partido a ehecuta den e desaroyo di e pais y den fortalecemento di un gobernaciob basa riba integridad y transparencia. For di su fundashon, RED a keda leal na su principionan: promoviendo educacion innovativo y di calidad, proteccion di nos medio ambiente, desaroyo agricultural, y combati corrupcion. Temanan cu anteriormente a wordo rechasa den Parlamento, awor ta wordo adopta pa varios otro partido político.
RED Democrático ta sigui existi y ta comprometí pa continua su lucha pa defende derechonan di tur ciudadano. Nos ta pone integridad y transparencia den centro di nos manera di traha, promoviendo un modelo di desaroyo cu ta beneficia henter comunidad, y no solamente un grupo chikíto.
Nos ta gradici di curazon tur votante, miembro y simpatisante cu durante e 22 aña aki a duna nan sosten den forma voluntario y cu amor pa nos pueblo. Un gradicimento especial ta bai pa: sra. Julie de Cuba, sr. Henry de Cuba, sra. Ortencia van Putten, sr. Rudolf de Kort y famia di sra. Carla Paris †, pa nan gran aporte y entrega. Nos tambe ke reconoce e contribushon di esnan cu a tin un rol den directiva of como candidato, manera sr. Servito Thijsen y su famia, sr. Elio Nicolaas, sr. Robby Croes y sr. Mario Lopez.
Nos ta hasi un apelacion na e generacion nobo pa uni cu nos den e lucha, tumando e bandera di speranza y progreso pa hiba nos isla dilanti, hunto.
