NOTARIO A ANUNCIA NOMBER DI E INTERESADONAN DEN REOI 1 Y REOI 2!

Diabierna pa 11’or di mainta e proceso pa interesadonan entrega documentonan relaciona cu REOI1 y REOI-2 a cera oficialmente. Pa 3’or di atardi Managing Director, señor Rennie Arends den compania di Notaris Chamila Tromp, asisti pa su Compliance Officer a efectua apertura di e Dropboxnan digital.

Mester remarca cu ful e proces tabata uno digital, pues ningun documento fisico a wordo entrega. E proceso aki tambe ta algo completemente nobo pa Aruba. Cada interesado den e proceso aki tabata tin su propio Dropbox den cual e tabata por a suministra tur documento cu tabata wordo pidi. Ningun otro persona fuera di e interesado y notario tabata tin acceso na e Dropbox. Esaki tabata pa garantisa integridad di cada Dropbox. Den cuadro di transparencia den e habrimento di e Dropboxnan, tur interesado a haya e linknan via cual nan por a sigui e proceso di habrimento di e Dropboxnan. Prensa tambe por a presencia e acto aki.

Señor Rennie Arends na comienso a duna un splicacion breve di kico tanto REOI-1 como REOI-2 ta encera. Seguidamente Notario Tromp a pasa pa habri cada Dropbox individual. Na final di e acto a resulta cu tabata tin un total di 57 interesado den REOI-1,38 a cumpli cu nan Due Diligence y 29 a manda nan Respondent Form. Pa REOI-2 tabata tin 44 interesado, 34 a cumpli cu nan Due Diligence y 25 a manda nan Respondent Form.

Awor cu e proceso aki ta tras di lomba, RdA y su Advisory Committee lo mester a scrutina cada un di e documentonan cu a wordo entrega pa e interesado y for di eynan traha un short list cu lo haya un invitacion pa haci un Binding Proposal.

Cu e proceso aki lo cuminsa un era nobo pa refineria di Aruba. Sea lo tin un refineria moderno ta wordo establece cu e tecnologia state-of-the-art cu lo ofrece empleo cu ta paga bon pa e ciudadano di Aruba of nos lo conoce un industria nobo cu lo reemplasa e refineria actual. Den e ultimo caso aki nos ta cera un capitulo di economia di Aruba cu a dura casi 100 aña.

LEAVE A REPLY

Please enter your comment!
Please enter your name here