Desde 1975 Nel Oduber a keda encarga como Diputado di Teritorio Insular di Aruba y tabata esun cu a ehecuta entre otro e e introduccion di nos himno y bandera. Nel Oduber a trece su refleccion pa e celebracion di hinno y bandera 2023:
Awe 18 di maart cu ta nos dia decreta pa ley como nos “Dia Nacional l” y alavez dia pa nos keda recorda e fecha cu ariba e dia aki tambe nos a inaugura na 1976 nos himno y bandera y mas despues nos ortografia cu ta simbolo nan di union, libertdad, identidad y patriotismo.
E ta un ocasion bunita pa reflecciona y expresa bo amor y stimacion pa bo pais sea cu bo a nace aki of a bin biba serca nos den un pais cu pleno libertad.
Tambe tur nos hende nan cu awe ta den un otro pais cu ta segundo cas. E simpel himno/bandera aki ta balor nan spiritual pa nos cada un den kiko nos cada un kier mira den dje sea den momento nan di alegria of perturbacion.
Ora bo ta sinti pa bo pais sea unda cu bo por ta e mester ta bo compas di bida, unda bo a lanta, ser educa y prepara pa e reto nan den bida. Mi ta kere cu nos por mira atras ariba algo grandi cu Betico Croes a bin cu ne den un vision ta con ta uni un pueblo dividi pa diferente rasa y cu a bin di diferente pais pa forma nan biba aki. Sin e fortificacion spiritual aki lo no tabata facil pa realiza e anhelo di nos pueblo.
E simbolo nan aki di union, amor y libertad tabata e ingrediente nan grandi cu a duna nos den e referendum di 25 maart 1977 e tools nan pa prepara nos salida di e constelacion Antiyano un sistema politico di 12-8 cu a defrauda nada menos cu 2.147 Arubiano cu a firma na 1947/48 pa separacion.
Betico dfm. a realiza nan anhelo y deseo di mira Aruba afor di e sistema politico di Antiyas. Betico a cumpli cabalmente cu su pueblo y nos tur cu tabata tey y tabata yuda den tur bataya sa cuanto sacrificio y tempo e costa nos.
Betico un biaha mas danki pa tur cos. Awe ta un bon dia pa reflecciona nos cada un si nos ta haciendo suficiente pa defende nos posicion den Reino, nos democracia y nos libertad nan. Pensa tambe ariba nos obligacionnan, deber nan pa cumpli cu pueblo. Si nos cada un ta traha duro den cualkier function di baridor di caya te na e gobernante si nos ta practica suficiente labor, aumenta productividad pa yuda e pais aki progresa.
E mundo di awe en dia cu tur su avansa nan technologico ainda mester di e hende. E ta keto bay central. Ta e ta bin cu un vision, idea plan pa yuda e pais progresa. Nos despues di e mega debe y e efecto nan di e pandemnia ta birando un pais di culpa, blame otro di tur cos, menos nos mes carga responsabilidad di bisa con nos, abo lo hacie mehor y para pe tambe!!!!!!
E mundo ta pragmatico y cu teoria nan di “revolucionario nan” den oficina y pone cos ariba papel sin ehecuta nada a pasa.
Mundo a bira mucho critico hasta destructivo, unda a para bira cu kiko pasa e ser humano ta culpa di solamente gobierno cu a para bira un “ kapstok” pa colga tur problema hasta personal y frustacion sin para un rato keto kico bo mes ta haci y contribui cu cos ta bay asina.
Nos tin mucho hende cu ta keha na cas, zundra e plafond cu no ta te di lubida di expresa nos mes pa yuda.
Mucho hende pa miedo ta laga e silencio ta nan unico opcion. No ta pasobra bo vota pa un partido bo tin cu keda keto. E mester bay cu respet pa otro y pueblo no ta interesa den nos bida personal. E kier trabou, pan progreso pe tambe y trankilidad mental y su proteccion.
E problema nan mundial y guera cu abuso cu prijs di petroleo, gas ta asina grandi cu no tin tempo pa cos nan inutil.
Laga nos awe pensa ariba Betico dfm. con hopi no a kere den e lucha, hopi a para waak y spera cu e lo fracasa. Ata cos a dal nan tur. Como muestra di gratitud laga nos celebra nos Dia Nacional, pero tambe traha duro, aumenta bo productividad pa e pais por progresa.
Stop di pidi otro hende muri pa bo pa abo por drenta cielo. Bida ariba su mes ta duro pa nos tur y ta nos mes mester soluciona problema nan cu nos a crea. Tempo di keda yora culpa otro a caba. Pueblo kier resultado. Abo cu tur santo dia ta opone tur cos bisa con abo lo hacie mehor y con. Ban carga responsabilidad pa yuda nos pais. Lo tuma nos basta tempo si no tin mas union di pensamento pa sali afor y traha pa progreso y felicidad di nos tur. Danki Betico dfm. y pueblo pabien cu bo Dia Nacional.
Solo di Pueblo ta felicita Sr Nelson Oduber, kende tabata diputado encarga la realisa e inauguracion na 1976 y a lucha schouder cu schouder cu Betico Croes dfm
