Ora nos pidi Dios pa renoba nos mente y curason, ta pa nos mes , nos ta hacie pa asina nos por duna bon fruta y bon testimonio, pa gloria di Dios.
Ta dificil, pa cana den scuridad, y cana den lus na mesun tempo, pasobra un ta stroba otro di e crecemento positivo, pasobra ningun hende no por sirbi dos shon.
E renobamento di nos mente, lagando cosnan bieu bay, ta algo cu ta duna nos bentaha riba e plan di diabel y ta hala nos mas cerca na Dios.
Renobacion di nos mente ta parti di consagracion di nos bida, pasobra asina nos ta yega na e boluntad perfecto di Dios pa nos bida.
Ta imposibel pa nos biba manera nos kier sin temor di Dios, y kere cu asina nos ta bon y nos ta agrada Dios.
Den tur cos nos mester ta obediente na Dios, pasobra ta den humildad y obediencia , nos lo mira e gracia di Dios multiplica riba nos bida.
Renobacion di nos mente ta kita hipocrecia y falsedad y pone fieldad y firmesa den nos bida, pasobra e pensamento bieu di pica y inmorlidad ya no tin lugar mas den nos bida.
Laga amor ta sin hipocrecia. Aborece loke ta malo, tene forme na loke ta bon. Stima otro cu amor fraternal,duna preferencia na otro den amor, no flakia den diligencia,ma sea ferviente den spirito,sirbiendo Senjor, regosiha den speransa, perserverando den tribulacion,dedika na oracion,contribuyendo na e necesidad di e santonan, practicando hospitalidad.( Romanonan 12:9-13).
Tur esaki ta inclui ora nos renoba nos mente, nos ta bira hende cu ta bendiciona esnan cu ta persigi nos, pasobra antes nos tabata hende vengativo, pero awor cu un mente renoba, nos caminda di maldad a wordo corta, y nos ta cana den caminda, nobo y den e bondad di Cristo Hesus.
Cana ken sa exactemente locual tin den nan bida cu no ta agrada Dios, no laga ningun hende bisa bo, pero samina bo mes y wak cu bo ta den Fe, samina bo mes y pone bo consenshi bo dilanti, y wak si bo ta haciendo bon, si bo ta cu Dios constantemente, of bo ta cu Dios temporalmente, bibando manera bo kier y no den completo obediencia na Dios.
Pa boso wordo renoba den e spirito di boso mente,pa boso bisti e hende nobo,cu a wordo crea segun Dios den husticia y santidad berdadero.( Efesionan 4:23-24).
Ora nos renoba nos mente , nos lo aleha for di e obra nan di carni, cual ta completamente contra e boluntad di Dios, y nos tur sa cu esnan cu ta participa den obra nan di carni lo no hereda e reino di Dios.( Galationan 5:19-21).
Un persona cu mente renoba ta un persona cu sa di pordona, pasobra e ta reconoce cu si e no pordona, Dios tampoco lo pordone, pesey renobacion di nos mente ta importante pa nos bida spiritual y fisico.
Awor esun cu a prepara nos pa e proposito aki ta Dios,Kende a duna nos e Spirito como garantia.( Efesionan 5:5).
Warda bo curason riba tur cos, e ta e fuente di bida. Kita for di un boca enganjoso, y tene lipnan perverso, for di bo.( Proverbionan 4:23-24).
E ta un gran berdad cu na final di tempo, Senjor lo manda su angelnan , pa separa e yerba shimaron for di e maishi (Mateo 13:36-43).
Locual ta para scirbi lo no cambia y no tin ningun hende pa cambie, pesey nos mester renoba nos mente y prepara pa e binida di Senjor.
Laga nos tene bon cuenta awe.
Sinceramente,Pastor Marcel Balootje
