Wardacosta Caribe Hulandes ayera nochi a risibi un notificacion via di e radio maritimo VHF canal 16, na momento cu un boto tawata indica na un tankero cu e la haña problema riba laman. E boto cu nomber Aribel tawata mas o menos 30 mia west di Aruba y e tripulacion tawata mester di asistencia inmediatamente. E Centro di Operashon Maritimo di Wardacosta mesora a dirigi e helicopter pa e area caminda e boto tawata, pa por yuda e dos hombernan na bordo.
Na yegada na e sitio e helicopter di Wardacosta a asisti e dos hombernan na bordo y a hisa nan paden di e helicopter. Despues di a sacanan for di nan boto a hiba e dos hombernan aeropuerto di Aruba, e dos personanan a yega Aruba ‘safe and sound’. E boto Aribel a ser rescata awe pa e boto Orion di Aruba.
