Un hende drechi no por wordo cumpra cu placa.
Un bon muher no ta wordo cumpra cu placa.
Un bon homber no ta wordo cumpra cu placa.
Un bon hogar no ta wordo forma a base di placa.
Mayor no tin mester di ta miyonario pa educa su yuinan.
Un matrimonio no por depende riba e placa cu tin na banco.
Un homber ta sinti su mes mas mihor serca un muher cu ta dune respet,cu un muher cu ta mantene cu placa.
Un muher ta sinti su mes bon serca un homber cu ta respeta su persona, cu serca un homber cu ta dorne den placa.
Placa NO tin mas balor cu reputacion, bo por tin miyones na banco, pero si bo reputacion ta malo banco lo sera bo cuenta.
Un hende cu ta halsa placa mas cu hende, no tin amor pa e ser humano.
Un hende cu ta bende su bon amigo pa placa, no conoce balor di amistad
Esaki mester wordo sinja na nos Hubentud di awendia:
Un bon nomber ta mas desea cu gran rikesa,y aprecio ta miho cu plata y oro ( Proverbionan 22:1)
Ta e sistema di mundo, ta pone nos hobennan pensa cu placa ta resolve tur cos, te hora nan pasa den e experiencia cu esey ta leu for di berdad.
Hopi hoben a keda decepciona ora nan a ripara cu nan placa, y placa di nan mayornan no por libra nan di e problema cu nan ta den, y hopi biaha nan tin di sinta nan castigo completo pasobra placa no por a cubri nan maldad.
Tene cuenta cu bo reputacion, bo actitud, ta bo carta di referencia na unda cu bo bay, pasobra mal manera ta flat tire unda cu bo bay e ta zona.
Mas decente bo ta . Mas mihor pa bo mes, mas porta ta habri pa bo, tin biaha bo no ta califica pa un trabao, pero e solo hecho cu bo ta decente, ta yuda bo alcansa bo meta,
Pasobra placa no por cumpra honor y respet.
Placa no por cumpra humildad, pasobra un hende por ta humilde y toch tin placa, pasobra su humildad ta depende di Dios y no di su placa.
E confiansa den placa, ta debilita hende pasobra un hende rico sin Amor y Respet pa su cas y su Famia, ta un hende pober.
E palabra por ta fuerte, pero ta asina tin cu papia , pasobra no tin nada cu mas balor pa un hende cu su propio famia.
Pesey ora un hende ta den adulterio, pensando cu ta asina ta biba, e persona ey a traiciona cu casa y su yiunan.
Un bon nomber ta miho cu un bon colonia, pasobra e fragancia di colonia ta baha, pero un bon nomber su forsa ta aumenta tur momento.
Ta tempo pa nos splica nos hubentud e balor di un bon nomber, pasobra tur hende kier ta banda di un persona cu tin respet pa su mes y pa otronan.
Sin bo sa, bo ta wordo reconoce, y hasta ora bo no tey, bo nomber ta wordo menciona pa bon, pasobra bo hechonan ta bon.
Ta tempo pa nos hobennan realisa cu manera bo ta bisti, ta mustra si bo stima bo mes y si bo tin balor di bo curpa, y mas cu tur cos, Si bo kier pa hende respeta bo.
Te hasta un mucha ta wordo, conoci pa su hechonan, si su conducta ta puro y recto.( Proverbionan 20:11).
Laga nos respeta , pasobra respet ta mas importante cu placa.
Sinceramente, Pastor Marcel Balootje
