Ta para scirbi den testament bieu: Honra bo tata y bo mama, pa bo dianan wordo prolonga , den e tera cu Senjor bo Dios ta duna bo.( Exodus 20:12).
Ta para scirbi den testamento nobo: Yuinan obedece boso mayornan den Senjor, pasobra esaki ta husto, Honra bo tata y bo mama( Cu ta e prome mandamento cu promesa) pa bay bo bon, y pa bo tin bida largo riba tera.( Efesionan 6:1-3).
Prome cos cu nos tur como yiu mester haci ta respeta y stima nos mama, pasobra ta e Dios a permiti pa carga nos nuebe luna largo pa trece nos na mundo.
Tur hende na mundo a nace for di un homber y un muher, esey ta un berdad cu ningun hende no por rechasa, hende por tribi na ganja nan mes , pero berdad semper lo alcansa mentira.
Homber cu homber no por traha ningun yiu, y muher cu muher no por traha ningun yiu. Pasobra e sistema aproba pa Dios ta cu un homber y un muher mester tene relacion sexual cu otro pa asina ser humano por wordo multiplica, y asina ta tuma lugar den mundo di animal, y asina den mundo di insecto tambe, no laga nos lubida locual ta para scirbi den ( Genesis 6:19-21 y Genesis 7:13-16).Cada un tabatin su pareha.
Awor ora ta trata di e muher cu ta nos mama, nos mester respeta y stima nos mama.
Ora bo ta respeta un hende bo ta tende di dje, bo ta pone atencion, bo ta obedece bo ta dune carinjo y amor, y mas cu tur cos bo ta cuida di dje.
Awendia nos tur ta altura cu locual Pablo a scirbi den 2 Timoteo 3:1-5 a bira un realidad amargo cu nos tur ta confronta, pasobra Pablo a bisa cu lo bini tempo trabahaso y awor e tempo trabahoso aki a bira un pelicula cu nos ta mira tur dia.
Tur hende ta na altura cu hende a bira stimado di nan mes, y stimado di placa mas cu hende, y awor aki pa motibo di placa hende ta benta nan mama den un cas di anciano, pa nan por huur e cas, y hinca e placa den nan saco.
Pero tambe nos sa cu tin hende ta laga nan mayor bandona pasobra nan no tin tempo pe, e no ta pas den nan ambiente, y no tin ningun hende na cas cu kier pone tempo pe.
Hende a bira desobedecido na mayornan, y hopi ingrato, pasobra nan ta lubida con nan mayornan a lanta nan. Ken a cria nan, Ken a paga scol, tur eseynan ta wordo poni un banda, bisando cu no tin tempo. Tambe hopi hende ta stima placer mas cu Dios.
Esun cu maldiciona su tata of su mama, su lampi lo wordo paga den tempo di scuridad profundo.( Proverbionan 20:20).
Hopi biaha bo ta tende un yiu ta papia cu su mama cu hopi falta di respet, y bo ta puntra bo mes, ta ken ta e mucha y ta ken ta e hende grandi. Tin yiu cu ta hisa man pa nan mama.
Tin un generacion cu ta maldiciona su tata, y no ta bendiciona su mama.
Tin un generacion cu ta puro den su mes bista y toch no ta laba di su mes sushedad.
Tin un generacion esta orguyoso su wowonan ta. E ta wak cu menos precio ( Proverbionan 30:11-13).
No ta dia di mama solamente mester bishita mama, pero henter anja, mester duna respet , amor , carinjo.
Stima bo Mama.
Sinceramente Pastor Marcel Balootje
