Caminda no tin respet y no tin humildad no tin felicidad, pasobra nan ta e dos yabinan di mas importante den un famia.
Si mayornan no ta respeta otro yuinan lo no lanta cu respet ni pa nan mayor, tampo pa otro hende.
Tin cosnan cu si nos no pone nan na ordo, nos no por biba na ordo, pasobra ordo ta bini di Dios.
Respet ta trece stimacion den famia, pasobra un hende por tin hopi,hopi placa pero si e no tin respet, su actitud ta haci bida di otro hende dificil.
Si un hende ta orguyoso, no sa di pidi despensa, of pordon, e ta trece discuccion tur momento pasobra orguyo ta enemigo di felicidad.
Respet y Humildad ta balansa di cada hogar. Si no tin respet y no tin humildad, no tin pas y no tin trankilidad.
E palabra di Dios ta bisa den Genesis 2:24 :Pesey un homber lo bandona su tata y su mama, y lo uni cu su esposa,y nan lo bira un carni.
Pa bira un carni e homber mester stima su esposa y e esposa mester somete na e homber.
Y esey no por sosode bao di grito, zundramento, menasa y rabia, pero den un ambiente di respet y humildad tur cos ta cana drenta otro.
E palabra ta bisa cu nan lo bandona tata y mama, pero e palabra no ta bisa cu nan lo bandona Dios, y haci cosnan riba nan mes y lubida Esun cu a uni nan.
Caminda tin respet y humildad, no tin ofensa, pero tin bon comprondemento, bon relacion,bon intimidad, pasobra nan cada un ta conoce e otro su necesidad.
Caminda tin respet y humildad tin pordon, tin encurashamento, un ta sostene otro, pasobra nan dos ta uno,nan sa con di biba tanto den abundancia, como den escases.
Boso soporta otro y pordona otro, si un di boso tin un keho contra otro, mescos cu Senjor a pordona boso,asina tambe boso mester haci.( Colosensenan 3:13).
Laga amor ta sin hipocrecia,Aborece loke ta malo, tene firme na loke ta bon. ( Romanonan 12:9).
No ta existi amor moderno, mas personal hende ta cu otro mas profundo amor ta penetra, pasobra e sistema moderno di mundo ta pone hende confia den technologia, enbes di tuma tempo di berdad pa otro, especialmente ora ta trata di asunto di Famia.
Wak bo yiu den su cara ora di papia cune y no confia videocall, bo presencia tin mas balor cu un yamada,expresa bo amor cu bo presencia, no cu yamada.
Yiunan ta un regalo di Dios,nan ta un herencia di Senjor, e fruta di barica ta un recompensa.( Salmo 127:3).
Felicidad ta depende di respet , humildad y bon comunicacion, tin caminda bo ta mira hende di menos recurso ta biba den felicidad, mientras cu hende rico ta tuma curso pa por biba bon cu otro.
Den un famia nos mester sinja sirbi otro, y esey ta un ehempel cu mester sali for di e mayornan, demostrando respet un pa otro, cual tambe ta trece unidad den Famia (Salmo 133:1).
Pesey tur locual ta orguyo,
Tur locual ta arogancia,
Tur locual ta falta di pordon.
Tur locual ta mentira,
Tur locual ta envidia, nos mester mantene leu, y yama bon bini na respet y humildad.
Yuinan obedece boso mayornan den Senjor,pasobra esaki ta husto, honra bo tata y bo mama, cu ta e prome mandamento cu un promesa) , pa bay bo bon, y pa bo tin bida largo riba tera (Efesionan 6:1-3).
No tin nada mas bunita den un Famia cu respet y humildad.
Sinceramente, Pastor Marcel Balootje
