Tur momento den nos bida, Dios ta mustra con responsabel E ta pa nos, te hasta tin hende ta kere cu tur cos ta bay di mes cu nan no tin mester di preocupa pa nada, pero e asunto no ta asina.
Dios ta ocupa su mes den nos cuido di tur dia,E ta proteha,warda nos , guia nos, y Su amor semper ta presente pa nos.
Nos por kere den Dios sin ningun duda, pasobra no lubida locual E a bisa nos;
No tene miedo pasobra Mi ta cu bo, no desmaya.pasobra Mi ta bo Dios.Lo Mi fortalese bo, si lo Mi yuda bo.Si lo Mi sostene bo, cu Mi man drechi di husticia.( Isaias 41:10).
Nos tur mester ta responsabel, pa nos hechonan, dilanti di Dios,pasobra ningun hende por haci bofon di Dios.
Mayor mester ta responsabel pa su yiu, esposo mester ta responsabel pa su esposa, esposa mester ta responsabel pa su esposo. Responsabilidad ta mustra ken nos ta y ken bos ta sirbi.
Wak e responsabilidad grandi cu Cristo Hesus tin pa nos bisando: No laga boso curason bira intrankil, kere den Dios, kere tambien den Mi.Den cas di Mi Tata tin hopi luga di biba, si no ta asina, lo Mi a bisa boso, pasobra Mi ta bay pa prepara un lugar pa boso. Y ora Mi bay y prepara, un luga pa boso, lo Mi bin atrobe,y ricibi boso serca Mi,pa caminda Ami ta, boso tambe por ta.( Juan 14:1-4).
Esun cu ta fiel den un cos masha chikito , ta fiel tambe den hopi, y esun cu ta inhusto den un cos masha chikito, tambe ta inhusto tambe den hopi. ( Lucas 15: 10).
Wak cuanto iresponsabilidad tin ta sosode rond di nos.
Coremento di auto burachi y iresponsabel.
Ninga di cria yiu.
Falta di atencion na nos grandinan.
Falta di atencion na nos hobennan.
Parandiamento sin control.
Falta di amor y aprecio pa famia.
Yega trabao tur dia laat.
Y tin hopi cos mas den cual hende ta iresponsabel, pero ta parse manera nan ta comfortabel, bao di enganjo di diabel cu ta hinca nan mas den scuridad.
Tur loke boso haci, haci boso trabao di curason, como pa Senjor, y no pa hende, sabiendo cu ta for di Senjor boso lo ricibi e recompensa di e herencia.
Ta Senjor ta esun cu boso ta sirbi.Pasobra esun cu haci malo lo ricibi e consecuencia di e maldad cu e a haci y esey sin distincion di persona.( Colosensenan 3:23-24).
Ora un hende ta responsabel, semper e ta crece, pasobra responsabilidad tin un aroma dushi, cu ta penetra tur caminda, hopi biaha un persona no tin grado di universitario, pero su responsabilidad a pone bira hefe caminda e ta traha.
Hende muher ta stima un homber responsabel, mas cu un persona cu tin placa y propiedad, pasobra nan sa cu un homber reponsabel semper lo duna nan atencion.
Ma si un hende no ta provee pa su mes hendenan y specialmente pa esnan di su cas, e a nenga fe y ta pio cu un incredulo.( 1 Timoteo 5:8).
Responsabilidad ta cana hunto cu humildad, hende humilde ta responsabel, por ehemplo un tata responsabel ta haci tur esfuerso pa henter su hogar ta salba, y cu henter su famia ta den oracion, y asina agrada Dios den tur cos.
Segun nos ta bira grandi nos tin cu bira mas responsabel, den tur locual nos ta haci , y especialmente den nos bida cu Senjor.
Responsabilidad ta atrae bendicion na abundancia, goso, pas, amor, y dedicacion.
Sinceramente, Pastor Marcel Balootje.
