ORANJESTAD – Dialuna ultimo a tuma lugar e ultimo partido di nos Campeonato di dam 2021.
Na promer lugar a termina Annelaine Jacobs cu un score di 20 punto.
Annelaine a perde 1 wega so y a tabla 4 wega.
Na segundo lugar tawata tin un empate entre Ricky Nisbet y Delbert Alexander ambos cu 19 punto.
Ricky a perde 1 wega y a tabla 5 wega y Delbert a perde 2 wega y a tabla 3 wega. Ricky a score mihor cu e hungadornan fuerte y a keda na segundo lugar.
E torneo aki a wordo hunga den e formato di un single round robin, unda tur hungador a topa otro 1 biaha.
Prijs-uitreiking lo tuma lugar mas despues.
Ajera (diaranson 15 Sept.) nos a start cu nos proximo actividad. Esaki ta un Legacy Tournament na honor di tur nos hungadornan cu ya a bai laga nos kaba y a contribui masha hopi pa haci e deporte di dam grandi aki na Aruba. Manera Tommy Thode cu a juda lanta e club Arowak, Joseph Deschamps cu tawata varios biaha campeon di Aruba, Cesar Marquez cu tawata den directiva di Arowak y a juda duna les na nos hobennan, etc..
E torneo aki ta wordo hunga segun e systema swisa y lo bai over di 7 rounds.
Den e systema aki hungadornan cu mes un tanto punto lo topa otro. Dus si bo perde bo wega, bo lo topa cu un hungador cu a perde tambe, asina bo ta hungando cu hungadornan di bo mes un nivel.
Un total di 12 hungador a inscribe pa e torneo aki.
Resultado di e promer round ta como lo siguiente
Daniel Diaz a perde di Ricky Nisbet, Delbert Alexander y Elogio Croes a empata, Hector Winterdal y Mario Jansen a empata, Rolin Croes y Chester Berkel a empata. E weganan entre Annelaine Jacobs – Octavio Croes y Eugenio Filiciana – Ricardo Wever lo wordo hunga den weekend.
Despues cu e resultado di e 2 weganan pending ta conoci, nos lo traha e pairing pa e weganan di diaranson awor 22 September.
Tur wega ta wordo hunga den nos clubhuis na Nieuwstraat 11 riba diaranson y ta start pa 7:00pm di anochi.
Si tin algun hungador cu ta interesa pa cuminza hunga dam na nos club, esaki ta posible ainda. Mester tuma contacto cu Octavio Croes (cel. 594-5590) of Mario Jansen (699-8245). Nan lo drenta e torneo cu 0 punto y lo topa hungadornan cu a perde nan promer partida.
Octavio Croes
Secretario di Club di Dam Arowak.
