Manera ta custumber, fuera di ricibi nan scoring sheets despues di e Prefinals y Finals mandatoriamente segun Rules and Regulations di e competencia, Stichting Musica ta duna tur band leaders y participante e oportunidad pa un “inzage”, na unda ta ricibi un bista di e puntonan cu cada presentacion a ricibi, cu specificacion di cada criteria.
Durante e anochi di revision riba dialuna, 9 di februari 2026 esnan presente a encontra discrepancia den e resultadonan di ACSM26 Soca Finals. Den forma abierto y transparente, Stichting Musica a comunica e sucedido na prensa y medionan di comunicacion y debidamente a yama un reunion cu caracter urgente pa e siguiente anochi.
E reunion extraordinario a tuma lugar riba diamars, 10 di februari 2026, na unda e caso y e fayo tecnico a wordo presenta y splica na tur band leader y participante. Siguientemente, e eror a wordo drecha y resolvi dilanti di tur hende y cada banda a wordo pidi pa controla nan scoring sheet un biaha mas.
Despues di un anochi largo, e resultado oficial despues di e revision intensivo aki a wordo presenta. E reunion a termina exitoso. Musico y artistanan a sali contento, den un ambiente positivo, cu e siguiente acuerdonan:
– E Top 5 ganadornan ta ricibi premiacion
– E lista di Top 10 ta wordo reconoci y publica
– Tur tres Rookie cu a clasifica pa e ACSM26 Soca Finals ta wordo honra
Stichting Musica ta gradici tur participante y band leaders pa nan tremendo cooperacion. Pa a haci nan mes disponibel a corto plaso pa atende cu un situacion fastioso, sinembargo sumamente importante.
