Diabierna 30 di augustus, otro tangana di marca mayor a tuma luga aya n’e palacio di biyar na Tanki Leendert. E 6 ekiponan di biyar bola 8 un biaha mas a enfrenta otro den un moda di “sin piedad”. E legendarionan di Barracuda a pasa e Gladiatornan un otro palisa riba nan “strafblad”! Sin mucho di pone o kita, simpelmente e Gladiatornan, cu excepcion di Maikel Tromp, tur nan spada tabata “slap” e anochi ey.
Riba otro mesa, e batidonan di hero bou guia di Elvis “Le Bon Bon” Evertsz y Emile “Gourmet” Kock, esta The Steelers, a mascara “sin misericordia” e ekipo cu ta carga nomber ominoso di “No Mercy”. Di e ekipo “Sin Piedad” aki, e unico dos hungado cu a saca cara tabata e duo di Mario M. y Pedro R., kendenan a logra score e unico punto pa “No Mercy”. “For the rest”, guynan hero-hero manera Marc Farro, Allan van Aanholt, Angelo “Machete” Tromp, Alberto D’Isle, y Arie Jansen, tur a sa di claba un penchi di hero traha shish-kebab di No Mercy!
Por ultimo, abrenunsia Satanas ora e gang di cacho brabo a subi scenario cu e gruñamento y blafmento feroz di semper! Sinembargo, e cachonan no tin e ferosidad di 20 aña pasa tempo di nan tempo di gloria. Djente a cuminsa cay na caminda, lana a cuminsa bira shinishi, y ta parce cu nan ta un tiki transformer tambe ya cu di herder “Indjan” nan a manera transforma den chihuahua di “Lage Put”! Cachonan di rasa manera Johnny Tromp, Elvis Tromp, Giovanni Farro, Kwek Petrochi, y George de Nobrega, tur a sali na careda gritando cayay-cayay ora cu e Mongoose a pone djente “vlijmscherp” den nan curpa cu score aplastante di 5-1!
Shonnan, keda pendiente pasobra e siguiente buelta ta te diabierna dia 20 di september proximo. Amplio tempo pa manera nan ta bisa na Hulandes “lik je wonden” y bin bek razo razo. Un otro torneo grandi cu tin cu tene bista p’e e fin di siman aki n’e Palacio di Biyar na Tanki Leendert ta e magno evento di ABCS 9-Ball Challenge di Dutch Caribbean 9-Ball en combinacion cu FEBIAR, unda nada menos cu 48 partisipante di Aruba, Bonaire, Corsou, y Sint Maarten lo bataya cuminsando di diabierna atardi te cu diadomingo pa e copa maximo! Entrada ta manera semper completamente gratis pa pueblo en general. Bin goza dje miho biyar den Caribe Hulandes! Yegaaa!
