Den cuadro di e ideanan y recomendacionnan cu a sali afo
durante e ultimo reunion di biodiversidad na Montreal Canada
den december, paisnan a acorda pa aumenta areanan protegi
rond mundo. UNESCO tin diferente programa cu por yuda den
esaki, por ehemplo e ‘Man and Biosphere (MAB)’, ‘World
Heritage Sites’, y ‘Global Geoparks’. Relata na esaki UNESCO ta
recomenda pa introduci na Aruba e programa di Man and
Biosphere (MAB).
Den cuadro di e idea aki, durante e siman di 3 di juli, UNESCO a
tene diferente reunion cu departamentonan di gobierno y
gruponan di interes (stakeholders).
UNESCO a pone fondonan disponibel pa Aruba por logra bin na
remarke pa obtene e ‘label’ di un MAB. Esaki lo bay den
estrecho cooperacion y coordinacion entre UNESCO, Parke
(FPNA) y Directie Natuur & Milieu (DNM).
Sr. dr. Marck Oduber, experto di ciencia pa UNESCO Aruba y dr.
Jean-Paul Ngome, hefe di seccion di ciencia pa UNESCO Caribe
a facilita e reunionnan. E reunionnan a bay den un forma
ameno cu hopi recomendacion y intercambio di ideanan.
Den areanan di MAB hende y naturalesa ta siña biba den
harmonia cu otro. Na otro paisnan e programa MAB a resulta di
ta un bon ehempel di con esencial un miho maneho y
proteccion di areanan natural ta pa mantene e ecosistema cu
sernan humano ta depende di dje y pa tene keintamento global
den cuadro di normanan internacional.
E programa di MAB a start fei aña 1971 y a transforma
mientrastanto den un nucleo pa innovacion den proteccion di
servicionan di ecosistema, conservacion di biodiversidad,
educacion pa desaroyo sostenibel, economia berde, blauw,
oranje, circular y inversion den solucionnan basa riba
naturalesa.
E programa di MAB ta bay mas cu solamente
proteccion/conservacion di naturalesa, y ta incorpora
maneranan cu hende ta co-existi cu naturalesa y unda
proteccion/conservacion ta bay conhunto cu desaroyo socio-
economico. Algun beneficio pa Aruba por ta diversifica y/o
innova e modelo economico di Aruba, aumenta balor turistico,
aumenta chens pa fondonan pa proyectonan, ‘niche branding’
pa productonan local, crea trabou den sector berde, blauw y
oranje, y cambio di mentalidad pa biba den un forma mas
sostenibel y/o regenerativo cu naturalesa.
E reunionnan teni den e siman di 3 di juli ta solamente e
comienso di e proceso pa Aruba por bin na remarke pa e label
di MAB. UNESCO lo sigui traha intensamento y brinda fondonan
pa yuda Aruba logra e label di MAB si e deseo keda activo.
