“Sessionnan aki cu stakeholder ta keda importante pa asina ora traha e programa pa e siguiente 4 añanan”
ORANJESTAD – Dialuna mainta, e reunionnan cu Stakeholders a continua en conexion cu formacion di Gabinete Wever-Croes II riba e areanan social, cultura y infrastructura. Prome Minister Evelyn Wever-Croes a enfatisa cu ainda ta importante pa reuni cu mas stakeholder. E acuerdo di gobernacion ta den liñanan grandi y a palabra cu pa final di october cada minister lo duna su parti pa asina tin un programa di gobernacion cu ta bay mas den extenso di diferente punto. P’esey e sessionnan aki cu stakeholder ta keda importante pa asina ora traha e programa pa e siguiente 4 añanan.
Dialuna a reuni cu Cruz. Prome Minister a gradici nan pa tur e trabounan cu nan a haci durante di e pandemia. Nan a sirbi 10 mil famia cu paketenan di cuminda cual ta algo hopi grandi. Den total nan a ofrece 100 mil cuminda cayente na esnan cu tabata tin mester di dje. A papia riba e retonan cu Cruz Cora ta enfrenta y con por yega na un miho cooperacion entre Cruz Cora y gobierno pa yuda esnan mas vulnerabel den nos comunidad.
Despues, riba e area di cultura, a sigui cu reunion cu Fundacion Atelier 89 cu a trece nan puntonan dilanti den un forma cu pasion grandi pa arte. Nan a trece e retonan cu nan ta enfreta y e sugerencianan cu nan tin. Un punto hopi importante cu nan a trece padilanti ta cu mescos cu ta inclui deporte y canto den scolnan, pa inclui mas arte den e curiculum ya cu ta hopi di nos muchanan por tin e talento artistico y asina un mucha por expresa su pasion pa arte kitando e asina for di riba caya y evita e riesgo cu e por bay den mal caminda. Nan a indica tambe cu tur luna nan tin exposicion cu ta gratis pa tur e scolnan y Gobierno lo bay busca un manera pa asina e scolnan por bishita e galeria di Atelier 89 mas frecuente. Despues di e reunion, señora Maria Silva-Hart a duna su declaracion na prensa.
E siguiente reunion tawata cu Funacion Movimento ta Bida. Un fundacion cu ta dedica na mehora calidad di bida di nos adultonan mayor. Nan a trece padilanti cu varios persona di edad den nos comunidad tin e impresion cu ora yega edad di pensioen, no mester traha mas y no lo tin dolor di cabes mas. Nan lo sinta zoya den un stoel. Pero e fundacion aki ta conseha pa cuminsa prepara prome cu edad di pensioen na kico si un persona ta bay haci despues di edad di pensioen pasobra sinta den un stoel di zoya no ta productive. Nan a mustra kico tur nan ta haci pa tene nos adultonan mayor ocupa. E parti di digitalisacion, parti social y movimentonan pa tene nan saludable. Nan a trece un programa hopi interesante y loke nan mester ta mas sosten pa asina por yuda mas adulto mayor. Nan a haci un peticion pa fomalisa e luna di october como luna di hende grandi, esey ta algo cu Gobierno lo traha riba dje. Despues di e reunion, señora Maria Leon a duna su declaracion na prensa.
Riba e area di infrastructura a reuni cu e Asociacion di Ingenieronan di Architectonan Arubano. E Associacion ADIAA ta asisti como stakeholder den aspectonan di desaroyo, construccion etc.. Nan a trece 5 punto padilanti pa cu sosten d gobierno. Importante ta pa regula e mercado aki nan ya cu tin hopi hoben cu ta studiando sea pa contratista, ingeniero of arkitecto y tin biaha e hobennan aki no ta haña mucho atractivo pa bin Aruba ora nan caba di studia mirando cu na Aruba bo no mester tin un studio pa bo ta un contratista of arkitecto of igeniero practicando den field. Esaki ta puntonan valido cu lo sigui traha cu nan bayendo padilanti. Despues di e reunion, señor Raffy Kock a duna su declaracion na prensa.
Diahuebs lo sigui cu e resto di stakeholders externo pa sigui despues cu esunnan interno cu ta e departamentonan di gobieirno cu ta importante den cuadro di formacion di Gabinete Wever-Croes.
