Siguiendo cu e reunionnan tecnico-deportivo cu Direccion di Deporte (DdD) ta tene cu e diferente federacionnan miembro cu a entrega plan di entrenamento pa 2026, a sinta cu Aruba Table Tennis Association (ATTA) pa asina repasa e plan entrega y mira e atletanan cu tin proponi pa posibel participacion na e diferente Weganan cu tin riba programa pa e aña aki.
Durante e reunion aki na Comite Olimpico Arubano (COA) a reuni cu Presidente Robert Croes y entrenador Rudy Raga, cu a duna un splicacion amplio pa cu e planificion, e evento nan cu tin riba program pa bay participa na dje, ademas di duna informa detaya di cada atleta cu a presenta na COA. ATTA a duna di conoce di ta trahando cu un bon grupo di atleta di diferente edad y ta buscando pa participa na diferente evento den region y internacional.
COA ta gradici ATTA pa e reunion unda a comparti nan proceso tecnico y e trabou cu tin ta haci pa e deporte di Tennis di mesa.
