E trabou pa revitalisa Bernhardstraat na San Nicolas ta sigui avansa, no solamente cu mas casnan cu ta haya un cara nobo, sino tambe cu un grupo creciente di boluntario cu ta dedica parti di nan diasabra pa contribui na e transformacion di e area. Prome Minister Mike Eman, kende pa casi dos luna ta participa activamente den e iniciativa, a destaca cu e resultado mas importante ta e sentido di forma parti di tarea boluntario y comunidad cu e proyecto ta despertando.
Casi tur diasabra mainta, Prome Minister Eman ta yega Bernhardstraat hunto cu boluntarionan pa sigui cu e trabou. Poco poco, mas ciudadano, organisacion y instancia a acerca pa pone man na obra y contribui cu nan tempo, material of otro tipo di sosten.
Segun Eman, e iniciativa a cuminsa cu e meta pa revitalisa Bernhardstraat, un di e entradanan importante di San Nicolas, pero durante e trayecto el a mira con e impacto ta bay mucho mas leu cu solamente verf y drecha fachada.
āNo solamente e casnan ta haya un bunita color, pero nos ta mira tambe cu e tarea di boluntario ta bin bek na Aruba,ā Prome Minister a expresa.
Casi dos luna di trabou ta bira visibel
Despues di casi dos luna di actividad, e cambio ta cada biaha mas visibel. Casnan cu durante hopi tempo tabata mester atencion ta haya un capa nobo di verf, mientras cu e aspecto general di e caya gradualmente ta cambia.
E progreso ta notabel tambe di bista di comunidad mes. Eman a conta cu durante e diasabranan nan ta ricibi palabra di aliento y reconocemento di habitante y personanan cu pasa den e area y mira e trabou tumando luga.
Pa Prome Minister Eman, e reaccion aki ta importante pasobra ta mustra cu un accion relativamente simpel por genera un efecto mas amplio ora hende ta sinti cu nan mes por forma parti di e cambio.
Glenda Thomasia tambe a expresa su satisfaccion cu e iniciativa y a califica e esfuerso como algo positivo pa comunidad. El a probecha e oportunidad pa expresa palabra di gradecimento na Prome Minister Mike Eman y alent’e pa sigui cu e bon trabou cu ta haciendo.
Cada man ta conta
Eman a expresa su agradecimento na e boluntarionan cu durante e ultimo simannan a sigui presenta nan mes pa yuda. Diferente persona y organisacion a uni na e iniciativa, demostrando cu revitalisacion di un area no necesariamente ta depende solamente di Gobierno, sino cu comunidad tambe por desempeƱa un rol importante.
E participacion creciente ta precisamente un di e resultadonan cu mas ta entusiasma Prome Minister. Hende for di diferente parti di Aruba, cada uno cu su propio motivacion, ta yega hunto cu un meta comun: duna Bernhardstraat y entrada di San Nicolas un cara mas cuida y agradabel.
Eman a enfatisa cu e trabou ainda ta sigui y cu cada diasabra ta representa un otro paso den e proceso.
Mas cu solamente cambia color di fachada, e iniciativa ta demostrando loke por pasa ora comunidad ta uni rond di un meta concreto. Cas pa cas y diasabra pa diasabra, Bernhardstraat ta cambiando, mientras cu e espirito di trabou boluntario ta haya espacio pa crece atrobe.
