Gobierno di Aruba, pa medio di Departamento di Obra Publico (DOW), ta avansando cu un proyecto di mantencion grandi rib’e Wilhelminabrug, un componente importante den e infrastructura di Oranjestad. E brug ta permiti trafico pasa diariamente riba L.G. Smith Boulevard, un di e arterianan principal di Aruba.
Segun vocero di DOW, Elisa Chieh Chen-Lake, e trabounan a cuminsa na luna di september di aña pasa y ta consisti di un restauracion di e parti mas abou di e structura. “Nos a cuminsa aña pasa cu e trabounan intensivo bou di e brug. E trabou principal ta enfoca rib’e restauracion di e concreto cu durante algun decada a sufri desgaste pa motibo di salinidad, humedad y otro influencia ambiental,” Chieh Chen-Lake a splica.
Durante varios inspeccion e tecniconan, a tuma nota cu mester a kita difernte seccion di concreto y hasta reconstrui algun. E proceso a inclui eliminacion di concreto deteriora, limpiesa profundo di e area afecta y pone concreto nobo pa fortalece e structura. Segun Chieh Chen-Lake, e proyecto a enfrenta varios reto durante su ehecucion. “Un di e mayor retonan tabata e transporte di e material cu ta kit’e for di parti abou di e brug. Na cuminsamento no tabata facil pa haya compania cu por asumi e trabou specialisa aki. Sinembargo, DOW y e contratistanan involucra a sigui busca solucion pa mantene e proyecto den marcha.”
Wilhelminabrug tin un balor historico considerabel pa Aruba. E plan original pa construi e brug ta data for di aña 1940. A completa e construccion na 1954 y oficialmente a pone den uzo na 1955. Esaki ta nifica cu e infrastructura tin mas cu setenta aña sirbiendo nos localnan y turistanan. Segun DOW, esaki ta e prome restauracion grandi y integral cu e brug a recibi for di tempo cu a contrui esaki. “E ta probablemente e trabou di mantencion mas extensivo cu e brug a haya den su existencia. Gobierno ta invirti den e infrastructura aki pa garantisa cu e por sigui sirbi Aruba pa hopi decada mas,” Chieh Chen-Lake a indica.
Segun planificacion, DOW ta anticipa cu e trabounan principal lo keda completa den luna di juli of augustus di e aña aki. Gobierno ta sigui invirti den mantencion preventivo y restauracion di nos infrastructura, cu e meta di preserva e siguridad di nos trafico y proteha e inversionnan publico cu ta sirbi nos comunidad diariamente.
